蘇波記川湘粵菜館

營業中

休息中

終於捱過一星期，又到放假嘅日子。今日元宵佳節適逢港鐵有半價優惠，於是同女朋友計劃去咗長洲行吓。我哋遲起身，未食早餐；一落船先隊左個芒果糯米糍頂頂肚先，根住行過有個姐姐介紹食海鮮。佢話278有三個餸，海鮮小菜都可以，任揀。佢仲話送炒菜同湯。我哋見都多人食，姑且試吓。菜心同粟米羹係送嘅，另外我哋叫咗薑蔥鮑魚，粉絲蒜蓉蒸扇貝同清蒸䱽魚，另外叫多咗個白飯同啤酒。先講送嗰兩味餸，菜心都算鮮甜，而且份量唔算少。個粟米羹都算幾好味，每人有兩碗夠晒飽肚。蒜蓉粉絲蒸扇貝，係細粒啲，但係都新鮮；粉絲同蒜蓉都好味，而且有六粒都唔算少。薑蔥鮑魚每人都有兩粒，味道算唔錯。至於條蒸䱽魚，簡直係點睛之作，大條又多肉，蒸嘅火候啱啱好；條魚都好嫩滑。埋單共收327。我哋食得好開心，加埋個開陽海景，性價比甚高。食完嘢我哋經北帝廟上咗去北眺亭，行吓山沿途風景好靚，來回行咗一個鐘，輕舒腳頭夠晒寫意。