檀香山茶餐廳 (已結業)

自從一年前住理工宿舍成日食檀香山之後，無左宿舍後到依家都無食過啦。個時成日食檀香山係因為佢嘅菜色多元，各種嘅碟頭飯同港色粵式川式美食都有，價錢特別係晚市都係區內比較平嘅。今年有反宿舍就去食下，發現原來餐廳翻新左一波，成間檀香山係夜晚時真係好光，想人睇唔到、唔行埋去睇睇有咩食都難。咁除左光門面同內在都裝修得幾好嘅。至於食物質素同價錢就保持同以前差唔多。我叫左椒鹽豬扒飯46蚊，有湯有飲品。椒鹽豬扒炸得幾好食，面頭炸得均勻，內裡肉嫩有肉汁，椒鹽入味；仲有啲香蔥、香蒜同辣椒碎令成個飯十分香口。至於杏霜亦同以前一樣咁高質！佢比起一般茶餐廳或冰室大杯，而味道好濃郁，奶味充足，表面會凝結出一塊高質杏霜嘅杏霜膜！