嘉發小食

營業中

休息中

成日睇見有關呢間小食店的雞蛋仔介紹，慕名而至，但失望大於一切。由於雞蛋仔製作需時，所以，縱使俾錢購買唔係太需要排隊，但就要花時間等攞雞蛋仔，我哋同狗狗喺聖誕假期過嚟，等咗20-30分鐘。開心果雞蛋仔：賣相的吸引力一般，較深色的雞蛋仔上面有啲淺綠色線條點綴。正常大小。食落蛋味唔重亦冇乜開心果味，但每粒雞蛋仔裡面的確係夾雜開心果碎，粒粒搣出嚟都食到碎粒，而佢的開心果味就全靠呢啲碎粒帶出嚟。可能製作時受熱加上蒸氣影響，啲開心果碎全部都係「淋」身，冇乜開心果獨特的香味同味道。至於雞蛋仔本體，佢口感唔錯，外脆內軟，入面呈蛋糕仔的鬆軟狀態，相當飽滿，不過，以$40/底嚟講，主要都係想俾開心果味衝激下，咁呢底雞蛋仔就交唔到功課喇~由於等候需時，味道唔突出，所以唔會回購。可能原味係更好的選擇，只係蛋味唔夠香，純粹食質感又唔怕等的話都可以考慮。