熾工房 (已結業)

星期六留咗喺屋企休息🏡，所以就簡單喺附近搵嘢食。呢日想食熱氣嘢，我哋就決定幫襯一下位於高街嘅「熾工房Wow Lab」。我哋成日行經都覺得呢度環境幾Chill，有室外座位，而室內就油咗靚靚牆畫🎨，齋睇裝修未必估到呢度食乜。餐廳賣嘅食物熟口熟面喎，似菲律賓蜜蜂同炸雞爺爺快餐店嘅混合版🥡，佢另外仲有其他食物，例如漢堡包同意粉等。價錢比起連鎖店貴，不過學生食就有折。風味烤雞套餐($68)，🐔烤雞同炸雞各有特色，烤雞相對無咁熱氣，更顯雞肉嫩滑。燒雞配上芥末汁食，能夠刺激味蕾，滋味無窮。本身一客雞有兩件，但唔知係咪比較細隻，所以有三件。蘑菇飯(+$5)，呢度嘅出品比起某連鎖店嘅蘑菇飯更出色。醬汁係忌廉蘑菇汁🍄，有啲似忌廉湯，味道唔辣，老少咸宜。再混入新鮮菇菌，菇香特別濃郁；但略嫌白飯口感偏濕🍚。滋味脆雞套餐($66)，🍗炸雞即叫即整，新鮮滾熱辣送上。外皮酥脆，一啲都唔油膩，而且肉汁滿滿，肉質富彈性，唔係M炸雞嗰種霉肉。炸雞配埋自家製肉汁食，幾正。牛油粟米，🌽粒粒栗米杯OK，牛油落得夠多。蕃茄扁意粉配牛扒菇($58)，呢個係素食菜式，但味道毫不單調。🍝 扁意粉口感彈牙兼掛汁，蕃茄味幾濃🍅，酸味自然。