大麥牛肉麵 (已結業)

自從華明百佳同樂怡759都冇埋基本上都唔會特登行果個上山位，咁啱偶然經過發現原來果頭新開咗間牛肉麵，仲做緊頭幾日開張八五折，兼有得抽獎添（然後零抽獎運嘅我抽中咗另一張八五折劵🙄😂）小店菜色選擇唔多，都係麵飯同少少鹵水小食，叫咗碗紅燒牛肉麵，可以揀唔辣幾貼心，比較特別係佢有蕎麥麵揀，不過第一次試就揀基本款先。幾鐘意呢度個湯底唔係大刺刺嘅濃湯，而係香得嚟又幾柔潤果隻，都我差唔多成碗飲哂，飲完唔覺話好頸渴，聽店家話係用牛骨煲出嚟😌牛肉就用牛𦟌位，切得幾薄，有啲位都幾韌下，牛味唔算話特別濃，可以再好啲，而蘿蔔就超鐘意，煮得腍哂入哂味又甜，一啲草腥味同白位都冇，我會想另外叫一碟食囉。本身個麵仲跟隻蛋，不過賣哂就轉咗雞腿，滷水味稍淡不過不失，但無啦啦多件肉食已經好開心😂至於小食叫咗個皮蛋豆腐就有啲失望，成磚百福豆腐咁，個汁好稀好淡同冇汁冇分別，要靠豬肉鬆先提到味，皮蛋就有微量軟心，如果再溏心啲就好好多😗 不過始終都只係開業咗幾日仲有好多微調嘅空間，希望下次去會更上一層樓✨