凱悅海南雞專門店 (已改名) 查看

有谷友介紹過凱悅海南雞，是日順路就黎試下佢，位置在教育路盡頭，近元朗警處個邊。兩點黎到都滿座，嘩，平日喎，咁真係好受歡迎呀。叫左一碟海南雞飯同一碟鹽水鴨飯，收到order店員即刻入左去斬雞，聽講話係自設農場嘅冰鮮靚雞黎喎，好期待呀。飯未ready就飲住湯先啦，用雞殼煲嘅紫菜湯，鮮甜無味精，勁好飲，叫飯餐就有得送啦，抵！飲完湯飯就到了，賣相幾正。朋友要左無骨海南雞飯，飯可以揀白飯或黃薑飯，仲可以轉米線/河粉/米粉添。海南雞嘅份量一啲都唔細，去左骨雞肉都仲好厚身，非常嫩滑，雞皮下亦不肥膩，高水準之作。自己就點左無骨鹽水加積鴨飯，飯底揀左白飯。同樣鴨肉很多呢，賣相雖然平凡，但食落有驚喜，鴨肉鮮味有咬口，鹹鹹鮮鮮非常好食，個人覺得鴨更吸引，坊間少有好食嘅鹽水鴨嘛。另外餐飲要左凍檸茶，朋友要左椰汁紅豆冰。檸茶茶底幾香，檸檬無苦，幾好飲呀。朋友杯紅豆冰好好飲，勁香椰汁味，紅豆煲得軟腍又不過甜，勁正～雞鴨都係高水準之作，好味又抵食，有下次！