碗碗香 (已結業)

約左友人黎銅鑼灣行街，就黎加路連山道搵下有咩食。未喺香港食過貴州菜，所以就去試下。呢度招牌係食牛肉麵，由於同行友人唔係好食得辣，所以佢叫左清湯牛肉麵，我就叫左bb辣嘅紅油牛肉麵。紅油牛肉麵 - 飲左啖湯，唔係好油，牛肉好正，牛味濃，重點係唔痴牙，你知啦，最怕出街食牛肉食到啲牙縫都係肉，好影響。同埋啲面好特別，樣似烏冬，但滑過烏冬同埋彈牙啲。真心推介！bb辣嘅程度一般港人都應該食到。清湯牛肉麵 - 老闆話清湯冇加味精，試左啖，係幾清，飲多幾啖先。呢碗唔係牛肉粒，係牛展，一樣咁好食，牛味好濃好香。呢度啲牛真心唔錯。老闆仲有推介苦丁茶，話係清熱，就叫左一凍一熱試下。友人話有啲苦，我覺得可以接受，可能我飲凍，有啲冰稀釋下，飲熱可能會苦少少。不過食完碗熱野之後飲返杯凍野係幾舒服。見到隔離枱對情侶一人一杯玫瑰冰粉，我同友人都叫左一杯試下。幾特別，啲冰粉好清涼同好香玫瑰味。最正係啲芝麻，炒得好香，夏天食幾正！最後埋單一人$85，幾抵👍🏻