鮨亭 (已結業)

紅橋嗰邊啲外賣食到嫌，見呢排天氣涼少少開始，夜晚出嚟搵下食！置樂呢邊地點雖然唔算太方便，屯市行過去要成十幾分鐘，就算住屯門都未必會識去，不過旁邊就有馬路可以泊車，揸車嘅人就好啱去！而且一帶都有唔少餐廳，唔少都有得坐喺出面，靜靜哋都 chill下！呢間日式餐廳之前一路都想試，不過幾次行過都因為無 book 位摸門釘，今次醒啦，一早 book 定就無死！角切刺身有蝦、三文魚同魚，都幾多魚生下，沙律菜加埋柚子醋調味唔會太鹹，又可以提鮮，食落好清新！隻蠔有手掌咁大，睇落好新鮮，飽滿肥美，一啖滑落口，淡淡海水味，真係好滿足！天氣涼涼哋，聽到鐵板嘅咋咋聲已經好興奮！和牛粒煎得非常香口，熟度適中，而口感亦好特別，唔似平時燒牛柳嘅軟腍，反而有少少爽嘅質地，最啱送酒！同樣係熱辣辣嘅仲有石鍋飯，飯面鋪滿厚厚嘅芝士同蟹皇，拉絲嘅芝士同鮮味嘅蟹肉撈飯一流，飯仲有少少飯焦，脆卜卜咁，好似食緊煲仔飯。啤酒上面有一層泡，入口有微微嘅巨峰香味，味道屬於比較甜，而微苦嘅一種，男女都啱飲。我個人比較鍾意飲梅酒，同樣係比較甜嘅酒類，入口清爽，濃度唔會太高，好啱女仔少斟！