悅滿軒

老公嗰日突然心血來潮，佢話同事介紹佢位於美孚嗰邊嘅一間餐廳，食物又高級又好食，就帶我去食餐勁嘅。我哋嘅主食係✨美國頂級牛腹肉12安士✨烤西班牙伊比利亞黑毛豬鞍架配南瓜燴薏米，蘋果牛仔汁美國頂級牛肉果然名不虛傳，肉質厚實，十分鮮嫩，絕對係個頂級嘅食材。西班牙黑毛豬鞍架肉味香濃，堪稱豬肉中嘅「和牛」，油潤甘香，肉嫩多汁，口感同味道遠勝一般嘅豬肉。我哋發現呢度只要$128，就可以任飲紅酒同白酒，鍾意飲酒嘅人當然唔可以錯過。更令我哋驚喜嘅係法國生蠔居然只係$10一隻，令我哋蠢蠢欲動，直接落單8隻生蠔，邊食生蠔邊配白酒，真係享受。法國生蠔非常新鮮，果然係最好食嘅生蠔之一。甜品我哋食咗菠蘿雪葩配沙巴翁，酸酸甜甜嘅味道為呢餐豐富嘅晚餐劃上完美嘅句號。