炑八韓烤 (黃大仙中心南館)

營業中

休息中

餐廳位於黃大仙中心南館地下，主打韓國燒烤，店內座位闊落，空間感十足，食完都唔會有陣味。Order完就送上經典韓式前菜，有蘿蔔、豆芽、海帶、泡菜、薯仔蓉、沙律菜，爐旁邊嘅芝士粟米同泡菜蛋漿都可以無限添加，個人鍾意整到半溶狀態就食，如果唔係都可以等到全熟。鹽蔥牛舌旨味套餐包括鹽蔥牛舌、牛五花肉、梨汁雞腿肉、秘制醬油豬五花、蔥蒜牛胸腹肉同芝士生蠔。牛舌薄身，鹹香味出、牛五花肉同牛胸腹肉牛味香濃、雞腿肉嫩滑多汁、豬五花肥瘦適中、芝士生蠔大粒飽滿，各有千秋，點醬連同紫菜飯同生菜包住食都幾過癮。冬天當然唔少得飲返碗暖笠笠嘅韓國湯，薯仔牛肋骨湯熱辣辣上枱，牛味突出，牛肋骨啖啖肉，將白飯落去變湯飯仲正。石頭鍋飯配料十足，如果想有飯焦嘅話建議放耐啲先好撈勻佢，上面鋪滿韓式配料，另外可以按個人喜好加入醬汁，唔辣，提味。飲品有薑橙同玫瑰佛手柑梳打，凍冰冰，甜度適中，十分解膩。