新派韓食館 (已結業)

之前喺大圍都試過一次韓國餐廳，食物唔錯而且又唔貴，朋友話佢喺長沙灣都開咗間分店，今日去開個頭所以就入去試吓。餐廳裝修嘅風格同大圍嗰間差唔多，都係韓式路線，侍應全部都係韓國人，唔講重以為自己去咗韓國。泡菜蠔仔煎餅＄82煎得好香脆，好鍾意去嗰邊脆脆地，蠔仔嘅份量都唔少，泡菜令到個煎餅有少少辣，好開胃，我同朋友都爭住食。漢拿山豚肉炒飯$128由韓國哥哥幫我地即席炒飯，仲整到星星型，真係來自星星的你，個炒飯有驚喜，韓國哥哥係炒飯嘅時候落咗啲韓國燒烤汁落去令到個飯有少許甜味，好好食，仲要撈埋芝士同雞蛋落去好正。飛機醬缸醃蟹＄188 全晚最期待嘅菜，之前成日知道韓國最出名嘅醃蟹，但真係第一次試，又係由韓國哥哥幫我地處理，即席幫我地拆蟹，將蟹肉同蟹膏撈落去飯入邊，好重蟹味，而且非常「鮮」，好似食緊刺身蟹。菠蘿冰＄58之前喺大圍都試過，今次長沙灣嘅分店都保持水準，菠蘿冰酸酸甜甜非常開胃，仲有一大塊嘅菠蘿，飲完都好飽。