旺泰特食 (已結業)

話說今日係清明節，我同屋企人一齊去咗西貢玩。今次係我第一次食，但係係我阿媽阿爸第 N 次食。我哋叫咗豬頸肉飯，麵包咖哩雞同埋小食拼盤。首先講吓以上嘅豬頸肉飯。豬頸肉好香，脆脆哋，但肉質好腍，應該係炭燒嘅。白飯無乜特別啦，但略嫌有 D dry，食嘅時候建議淋上酸辣汁。嚟到今餐我最滿意嘅麵包咖哩雞！因為份量偏大，建議各位唔好自己一個食。好彩，呢個咖哩雞係唔辣嘅，有好香濃嘅椰汁味，唔係好食得辣嘅朋友都可以試吓。可惜，因為包嘅「容量」有限，所以材料好少；同埋包都被咖哩浸腍哂。因此，我建議各位咖哩控可以叫一個咖哩雞配蒜蓉包，包有埋 D 蒜香會再好食 D。最後係小食拼盤。小食拼盤有沙嗲串燒雞，炸春卷，炸蝦餅同魚餅。身為一個炸物控，我對呢個拼盤覺得好滿意。串燒雞已經有沙嗲味，可以唔點沙嗲汁。炸蝦餅熱辣辣，又好脆，好似係酒樓食嗰 D 炸蟹鉗。春卷嘅材料好足，係好典型嘅泰式素菜春卷。魚餅冇蝦餅咁脆，但味道好濃。食完之後，就明白點解佢會係 2014 年米芝蓮推介。尤其是咖哩，果然名不虛傳。大家去西貢，不仿試吓！