焰井 (已結業)

颱風係附近日日都有啲無情雨， 本來lunch想去食碗麵， 點知去到對面馬路附近橫風橫雨，企咗差唔多十分鐘都好似沖涼咁樣， 但就意外地發現咗呢一間舖頭~焰井( 其實我一開始望以為佢係丼)﹐ 見到佢門口寫住外賣有折， 我估自己都趕唔到堂食， 啲雨細啲就沖咗過去~入到去有位小姐好好招呼，拎咗外賣menu我睇， 周圍八下望下環境~呢度應該係食石燒， 不過疫情之下就做埋外賣丼~ 話說好耐都冇食過牛肉飯~ 就叫咗個和風牛肉飯， 朋友就叫左個燒魚飯， 有折之餘仲送嘢飲，都幾快手大概五分鐘鬆啲已經搞掂pack好曬可以拎走， 返到上去拿拿林開嚟食~因為真係已經好肚餓， 我個牛肉飯靠得住~ 醬汁味夠濃郁~ 牛肉唔鞋~份量唔算少~ 仲好多汁 ﹐如果飯嘅量可以再多啲畀我撈汁就一流啦； 朋友話佢燒魚飯都唔錯， 話又係唔會燒到好鞋， 望落好似好乾但係食落係啱啱好， 而且魚味好香~證明舊魚都幾新鮮~因為一場颱風雨搵到一間新食店幾開心，但比較搞笑係買完外賣出門口就係嗰幾分鐘啲雨停曬~仲出太陽，不過亦都令到我哋安然無恙咁帶啲飯盒返上去~都好嘅， 希望佢嘅折做耐啲…可以多啲嚟幫襯…