車仔麵之家 (已結業)

車仔麵餸菜配搭多，基本上冇人唔鍾意食，猴子亦係車仔麵愛好者之一，不過呢間車仔麵之家因為店舖比較隱蔽，平時冇留意佢嘅存在，今次都係頭一次幫襯。 猴子點咗油麵，餸菜就點咗牛腩、滷水腎同豬大腸。油麵係猴子至愛，貪佢夠煙韌有口感，而車仔麵之家嘅油麵亦煮得夠彈牙，唔太淋唔太硬啱啱好。 牛腩方面似乎煮耐咗少少，有啲鬆散。滷水腎味道還可以，不過冇想像中咁爽口。豬大腸較為可取，滑滑彈彈，而且脂肪唔多，亦夠厚肉。 整體嚟講係好味嘅，雖然價錢唔算便宜，食品亦要自己攞，冇人送餐，不過食得車仔麵，寬容度總係會高啲，之後都會繼續幫襯。