小漁港海鮮舫 鮮蒸‧鮮味火鍋

營業中

休息中

每次想食粥底海鮮火鍋，第一時間就會諗到小漁港，之前嚟過幾次都覺得唔錯，除左海鮮之外，佢仲有幾款小食，有脆皮豆腐、天婦羅番薯仔、燒魚干、避風塘鮮魷、椒鹽白飯魚、避風塘豬手等，食蒸鍋之前可以叫啲小食試下。套餐有兩款選擇，是日廚師精選套餐 $298 海鮮蒸鍋套餐 $398 (6位起)我地兩人就揀咗 $298 嘅套餐，有一款主食、四款時蔬、二款刺身，仲包埋個粥底。海鮮蒸鍋未上之前，先嚟過刺身，有三文魚、希靈魚、北寄貝、干貝、海膽等，樣樣都好新鮮。海鮮方面係老闆每日挑選新鮮嘅靚海鮮，每次嚟都可能會有唔同嘅驚喜，今日嘅精選海鮮有龍蝦、海蝦、扇貝、鮑魚，馬友魚、蟶子、沙白、蠔等⋯⋯海鮮用蒸氣鍋就可以食到海鮮嘅原汁原味，好鮮甜呀。食完海鮮就到蒸雞件(烏冬底)、還有日本蕃薯仔、南瓜、粟米、芋頭、勝瓜等，食到呢度都好似有啲飽。最後點到要食埋個海鮮精華嘅龍蝦瑤柱排骨粥，粥底好鮮甜，食完都想一碗接一碗。甜點係黑糖紅豆糕，食埋真係好滿足，飽住返屋企。總結：每位 $298 就可以試到多款原汁原味嘅靚海鮮，仲有個鮮甜嘅海鮮粥底，無論同屋企人或者同一班朋友，甚至乎慶祝生日嚟食都係一個唔錯嘅選擇。