元札幌拉麵 (宇晴軒商場) (已結業)

今日同朋友係附近玩夜左，未食飯，餓餓地周圍搵食。時間去到8點半，商場好多店舖都開始落閘，要搵到野食都唔容易，零零丁丁見到呢間仲開住門做生意，就入左去食。我叫左豚軟骨拉麵，d豬軟骨煮得剛剛好，保留左煙韌既口感，而且醃得好好味。不過個湯底就普普通通，唔算特別好食。朋友叫左雜錦拉麵，其實係豚骨拉麵既進化版，除左有豬軟骨，仲有其他餸，例如蟹柳。個蟹柳唔係普通係超市買到既頹蟹柳，應該係真蟹柳，味道幾甜幾好食。另外叫左個燒多春魚，個皮脆脆地咁幾好食，成條魚都食得，不過如果可以少d鹹就好啦。食完同朋友繼續吹左陣水，吹到大概9點半，當時周圍d客都走晒，都冇俾人趕，d職員算係咁啦。