倫哥尚品火鍋私房菜 (已結業)

最近天氣開始轉涼，大胃王朋友係咁叫打邊爐。佢又大食又唔明白任食打邊爐未必好食，所以今次搵咗一間私房菜半任食打邊爐去試下。一定要讚賞下啲服務態度，唔好以為打邊爐唔需要服務員。佢哋每一個服務員都好細心，由煮雞煲至打火鍋都會細心講解，點樣處理 ; 而且要加錢嘅食物都會講清楚。講到食物， 先嚟 一盅廚師靚湯，茶樹菇排骨雞腳湯不油膩，香味十足味道濃郁。再來一個雞煲 : 惹味雞煲味道冇得頂，越食越滋味。最緊要仲有得玩，喺你面前新鮮炒熟，冇花冇假。兩分鐘炒一炒，四次就食得。鍾意嘅自己炒，忘記咗服務員會過嚟幫你，放心。跟住就打邊爐連蟹煲都唔使加錢，不過我哋揀咗加30蚊有龍蝦食。先呢一個海鮮拼盤，又有鮑魚、又有聖子皇、龍躉、脆肉鯇、花甲… 款式多到都唔識。最重要啲食材夠新鮮。再嚟一份新鮮牛脊肉片，顏色鮮豔，雪花均勻，最緊要啲肉質夠曬嫩滑。而且蝦膠同墨魚膠都好彈牙，當然還有炸魚皮、響鈴、手工水餃雲吞、芝心牛丸 … 好多款式。仲要唔會漏單，還會問我哋夠唔夠食，需唔需要追加食物， 真係好細心。食物新鮮，服務一流，今個冬天要嚟多幾次。