影片
更多
2017-11-13
80 瀏覽
日本人鍾意講「食欲の秋」，因為秋天係農作物豐收季節，係好多食物當造嘅季節，加上秋高氣爽，可以舒舒服服咁慢慢嘆，的確令人食慾大振，呢個季節食Omakase(師傅發辦)都好啱，因為師傅會因季節而選用適當食材去料理。今次搵到嘅餐廳位於天后琉璃街，喺維園東邊出口行3分鐘左右就到。門面好有日式風格，最特別係頭頂有幾隻裝飾用嘅木窗框。而木門亦係閂埋咗嘅，只有經木門上細細長長嘅玻璃窗窺探裡面，感覺非常神秘，好似去咗高級會所咁。餐廳既然提供Omakase就一定會有日式料理枱前嘅座位，亦都有卡位、普通座位，普通座位之間有日式捲簾，增加私密感。鍾意睇住師傅喺你面前整嘢食嘅就坐喺料理枱前，想自成一角就坐卡位或者普通座位。啱啱坐底，店員隨即奉上熱茶，熱茶扮演好重要嘅角色，每食一樣食物之間要飲返兩啖，清清口中餘味，咁樣先食到真正味道~因為想食多啲款式食物，我地兩個人叫左一個【鮨豊special set】$800/人同一個【Omakase壽司course】$880/人，大家開心share~【鮨豊special set】前菜係【雜錦漬物】，有牛蒡、蘿蔔片等，酸酸甜甜，刺激食慾，亦順便清清口腔餘味。主菜係一盤上，好精
今次搵到嘅餐廳位於天后琉璃街，喺維園東邊出口行3分鐘左右就到。門面好有日式風格，最特別係頭頂有幾隻裝飾用嘅木窗框。而木門亦係閂埋咗嘅，只有經木門上細細長長嘅玻璃窗窺探裡面，感覺非常神秘，好似去咗高級會所咁。
餐廳既然提供Omakase就一定會有日式料理枱前嘅座位，亦都有卡位、普通座位，普通座位之間有日式捲簾，增加私密感。鍾意睇住師傅喺你面前整嘢食嘅就坐喺料理枱前，想自成一角就坐卡位或者普通座位。
啱啱坐底，店員隨即奉上熱茶，熱茶扮演好重要嘅角色，每食一樣食物之間要飲返兩啖，清清口中餘味，咁樣先食到真正味道~因為想食多啲款式食物，我地兩個人叫左一個【鮨豊special set】$800/人同一個【Omakase壽司course】$880/人，大家開心share~
【鮨豊special set】
前菜係【雜錦漬物】，有牛蒡、蘿蔔片等，酸酸甜甜，刺激食慾，亦順便清清口腔餘味。
主菜係一盤上，好精美，即係喪影相。條鯉魚好似想嚟睇食咁!
【黑鮪壽司3款(赤身、中拖羅、大拖羅)】
最肥美嘅大拖羅，係用火炙處理過，入口即刻爆油，滿口油香，再配合火炙後恰到好處嘅少少焦味，味道令人留下深刻印象。
中拖羅就冇經過火炙處理，見到面頭的油脂分佈已經可以想像到擺咗入口之後係咩感覺，果然係非常Juicy。而赤身就係魚側同背嘅位置，自然冇乜油脂，但魚味就相對會出啲~
【烏魚子海膽蝦丸】蝦丸上面係烏魚子，經乾燥處理後有咀嚼感，味道有少少似咸蛋黃。蝦丸外層有小小脆口，帶有一絲絲蝦肉，之後就係甘甜又彈牙嘅蝦膠，「核心嘅內圍」就係海膽漿。口感都味道都有幾個層次，非常唔錯。
牡丹蝦 上面有海葡萄，海綠色細細粒，好靚，不過食落係冇乜味架。牡丹蝦膠質重，蝦味濃郁，好似食緊一粒蝦味拖肥糖咁。
【海鮮丼3款(海膽、三文魚子、黑鮪魚腩蓉)】各自用3個玻璃酒杯裝住，配合餐廳嘅射燈，影出嚟好亮麗，感覺好似3位佳麗參加選美咁。
「最上鏡小姐」由三文魚子佳麗奪得，每粒三文魚子都晶瑩剔透，好似一粒粒琉璃珠咁。
「最有內涵獎」就係黑鮪魚腩蓉佳麗，因為黑鮪魚腩蓉加咗啲芝麻、香蔥去提升自己味道，外表唔係咁靚但食落非常之有味道。
冠軍我就頒咗俾海膽佳麗，獲獎原因? 冇架，我鍾意食海膽囉~ 當然海膽鮮味得嚟份量又夠多都係一個重要原因啦，咁多海膽撈落啲飯度特別好味。
【Omakase壽司course】
冷盤有【果茄、冰菜、鮟鱇魚肝】
店員建議要先食果茄，然後到冰菜，最後就鮟鱇魚肝，咁先食到真正味道~
冰菜係近年新興食物，面頭有一層冰珠，但又唔會溶，好似生長喺冰山上面咁，但成片擺入口，就感覺有少少脆嫩，但又唔駛特別去咀嚼已經軟化咁，口感非常奇特，食落又涼浸浸。
之前喺其他餐廳食過用鮟鱇魚湯做湯底嘅拉麵，魚鮮味濃郁，睇雜誌介紹過，營養價值非常之高。鮟鱇魚肝就第一次食，佢有「海底鵝肝」之美譽，都係珍貴食材，食落口感味道都真係有啲相似，非常綿滑入口慢慢融化。
【壽司10件】每件壽司都好新鮮肥美，果然係「食欲の秋」嘅出品。有金目鯛、花竹蝦、赤貝(上)
鰤魚、深海池魚、拖羅(下)
玉子、剝皮魚、喜之次、北海道海膽、秋刀魚︰
當中花竹蝦本身夠鮮爽，食落仲有黑松露味道，但打開裡面又唔見有平時黑漆漆嘅黑松露，原本想問吓店員，長吓知識，但掛住食又唔記得咗。秋天係秋刀魚當造季節，魚肉甘香濃郁之餘亦有一層皮下脂肪，夠肥美。
而鰤魚就係咁多件壽司中食落最鮮甜，肉質亦好嫩滑。
壽司拼盤當中有一件係玉子，店員話入面混有魚膠同蝦膠，不過我食落無論味道同口感都只係似甜甜嘅蛋糕，嗒真的係有輕微蝦味，但真係唔夠「出」。
手卷係黑鮪魚腩蓉，細卷咗少少，有芝麻提味，記得要趁紫菜仲係脆嗰陣食~
【鮨豊special set】同【Omakase壽司course】都配埋湯同埋甜品。
湯係鯛魚湯，裡面有滑滑魚肉、香菜、新鮮香菇，味鮮而濃郁，細細碗已feel到係精華所在。個碗蓋係咪好靚呢? 店員話係老闆喺日本訂返嚟架，係日本師傅用金箔手繪，價值不菲架。摸落仲好有凹凸感!
甜品係【靜岡蜜瓜+自家製奶凍】一擺上台我地嘅心情變化係---->。
來自日本嘅蜜瓜，聽已經feel到甜，仲要係靜岡蜜瓜，日本皇室御用架! 蜜瓜非常juicy，支叉拮落去軟腍嘅蜜瓜肉，啲蜜瓜水已經滲出嚟，食落果肉綿密細緻，極致嘅甜蜜，真係好想食又唔捨得食。
果凍係紅豆抹茶奶凍，紅豆喺面頭，抹茶就喺杯底，記得要食到乾乾凈凈~
呢餐真係大滿足，食材質量高，擺盤精美，一路食一路有驚喜。服務亦都相當好，我地一路食一路問，店員都有禮又親切咁答，手腳亦好俐落。由味道到服務都深深體會到日本飲食文化。
張貼
