Operetta (已結業)

飲食版圖開始擴闊，並伸延至金鐘。同朋友食好「西」，好「西」通常都會0係外國人聚集的地方，所以今次我哋去到太古廣場。Operetta在太古廣場中係中價位的食店，主打正宗意大利菜，所以不乏外國人幫襯。內裡裝潢都幾華麗，但有少少vintage的風格。餐牌全英文，上面亦有唔少菜式係傳統意大利菜，都係我哋冇見過的。好彩佢有列明ingredients，英文亦難唔到我。落單後，店員先送上麵包籃，內容都幾豐富，有好幾種唔同質感的麵包。其實幾款都幾好食，但當中我比較鍾意呢款。佢將麵包的表皮切成一塊塊，按扁再炸脆，就好似薯片咁。Appetizer揀咗一個鮮蜆肉，番茄醬、蒜蓉、洋蔥等等的配料成功咁帶出咗蜆肉的鮮味，好滋味。呢個和牛意大利雲吞令到我哋對餐廳加左唔少分數。首先係佢哋的誠意，佢知道我哋兩個人share，特登幫我地分成兩份。每一份都有大概八件，件件都係一絲不苟的正方形。咬開後，可以見到豐富的餡料如和牛肉碎、青豆、芝士等等。整體配合得好好，豐富得來恰到好處；質感Creamy得來唔會太膩。呢個豬腩仔肉亦好出色，首先擺碟已經好靚，令人眼前一亮。再者，經過慢煮而成的豬腩仔，每一件肉質都好嫩，而且層次好分明。