咖啡弄 (已結業)

今日放假，約左要返工嘅老公嚟咖啡弄食午餐。中午十二點幾就到，幸運地唔駛等位，仲可以坐四人枱，不過好快就滿座喇，有啲仲要搭枱。環境佈置都幾優雅，可能午飯時段人多，唔係一般cafe咁悠閒。繁忙時段每枱限坐1.5小時。食物見其他openrice食評相片都知份量唔細，喺盤算緊要三文治定窩夫好嘅時候，見到隔離枱嘅窩夫樣子普通，好似好實淨咁，就選擇左燻牛肉三文治，對於而家要補充鐵質嘅我好似較為適合。老公就要左bbq豬排三文治。另外每人最低消費一杯飲品，所以就叫左鮮橙汁、抹茶歐蕾。等左一陣食物就送到，真係好大份，每樣都有三件切成半份嘅三文治，同埋沙律菜、薯仔沙律。雖然食物外表好豐富，但食落普通。先講燻牛肉三文治，每件除左有兩塊厚切牛肉，仲有大量蔬菜，配蛋黄醬，牛肉只有咸味，似無肉味嘅牛𦟌，最差嘅係有大量筋位，咬唔開，三件都有同樣問題。豬排三文治同樣地夾有大量蔬菜，配上芥末醬，而豬排唔似平時食開嘅煎豬扒或吉列豬，反而似厚切火腿扒，唔知台灣豬排意思係咪火腿咁解，味道都係得咸味，冇豬肉味。老公話佢叫嘅抹茶歐蕾幾好，唔太甜、太澀。而橙汁有大量橙肉，似鮮榨嘅。由於食物份量太多，我最後要打包一件牛肉三文治。