和味館 (已結業)

放左工同同事黎到佢屋企附近的一間新開食店試試，地方超大，枱與枱間好濶落，加上冷氣足夠，感覺不錯啊！先開壺普洱茶，仲有花生小食，茶幾香，最緊要夠滾。秘制少林骨煲唔知食咩好，店員推介左呢樣，聽個名真係唔係好知係咩黎，上到枱時好香啊，即刻食俗大增。有啲似香蒜蜜糖金沙骨，但仲多左黑椒味，甜甜蜜蜜加上黑椒香，香口惹味，啖啖肉好好味。黃金茄子涼瓜呢味不得了，如果你係鹹蛋黃控必定要點！！超勁的鹹蛋黃啊，入口回味無窮～每一件都係滿滿的鹹蛋黃，涼瓜爽脆不苦澀，茄子軟腍多汁，兩樣不同蔬菜各有特色，但兩樣都超好味，食不停口。生煎蓮藕餅仲點左蓮藕餅，煎得金黃色相當吸引。鹹香的豬肉餅內有脆口的蓮藕粒，簡簡單單又幾好味，附上喼汁點，但個人覺得有沙律醬會更棒，哈哈。白飯都好大碗，熱辣辣的。有糖水送，可選紅豆沙或綠豆沙，兩樣都不太甜，適合現代人口味呢。餐牌，價錢大眾化，抵食！餸菜大大碟，兩個人點三樣有點太多了，超級飽啊，哈哈，好滿足。