大勝丼 (已結業)

第一次忍唔住寫食評。見係黃店又多正評，所以去咗幫襯。午飯時間一點幾入店，帶位樓面兼收銀只有一位姐姐，人手好唔夠，好彩當時食客唔多，佢都尚算應付到。但話晒疫情期間，樓面姐姐個口罩竟然只係一件裝飾品，由我入店到出店，佢個口罩都係箍喺下巴，完全零意識要戴好個口罩，反而唔使接觸客人嘅廚房哥哥就有戴好口罩。一坐底就上麪豉湯同麥茶，但因為一早「畢」定，碗湯只係微溫，湯料其實好足，同日本地道嘅麪豉湯非常似，唔係熱辣辣飲真係有啲嘥。點完自選魚生丼，等咗5-10分鐘左右就有得食，但因為想打埋鋪機先，所以上菜時只係瞄一瞄碗飯。打完機一準備食嘢，竟然發現樓面姐姐啱啱放低嘅魚形豉油碟入面，有隻大約1 cm長、腹部向天嘅曱甴，於是即刻叫樓面姐姐換碟。雖然佢有話「唔好意思」，但換第二隻碟仔都係有漬，惟有自己搵紙巾濕啲茶抹下就算。食物份量唔算多，不過魚生都幾新鮮肥美，劍魚腩夠厚又鮮甜。出得街食，眼唔見為乾淨，但見到有幾污糟就真係大打折扣，而且附近都有其他店有自選魚生丼食，店員又注意衛生，仲要平啲㖭，所以呢間應該冇下次嚕。