申子居酒屋

營業中

休息中

想食好耐嘅一間日本居酒屋，店內座位舒適，氛圍唔錯幾岩同朋友坐低飲返杯吹下水~海葡萄冰菜沙律 $148前菜揀咗自己第一次試嘅冰菜為主嘅沙律，食落好有新鮮感，冰爽嘅口感令人好開胃，簡簡單單咁配埋胡麻醬一齊食已經好好味。汁燒蒜片牛柳粒 $128牛柳粒熟度得啱啱好，口感偏軟嫩，肉汁亦都好夠，抵讚嘅係佢哋個特製醬汁，令整體味道提升好多。洋風雞肉卷 $148呢道應該係餐廳自家創作嘅菜色，佢將牛蒡同紅蘿蔔釀入雞肉入面，外表望落去好似係雞肉卷起嘅壽司卷咁。口感就突出一個層次豐富，同時間食到嫩雞肉、清脆牛蒡同爽口紅蘿蔔，味道亦係估唔到咁夾。舞茸豚肉卷 $68用舞茸多替咗金菇嘅角色，取而代之係更爽口嘅口感，味道香濃多汁，一啖一舊幾過癮。大蔥黑豚燒 柚子 $58一啖大蔥一啖豬，香口又惹味嘅一道串燒，食落仲有淡淡嘅柚子香甜味。火炙大蝦讚岐手打烏冬 $168一人份量嘅手打烏冬，湯底鋪滿櫻花蝦後再加上一隻火炙大蝦。烏冬食落係都幾彈牙，湯底非常濃郁，櫻花蝦亦增加咗整體嘅香味，大蝦啖啖肉夠惹味👍🏻。