Kind Kitchen (已結業)

琴日去咗上環嘅Kind kitchen 食飯，諗住試下新餐肉同新肉絲嘅菜式。新餐肉嘅所有菜式都含五辛，連餐蛋治都係，好似話係植物蛋入面有蒜。希望green common可以提供更多不含五辛嘅菜式，以迎合不同素食類別嘅人士。另外，餐牌上有一大部分嘅菜式都話售罄，所以選擇唔多。新肉絲香江炸醬麵 ($56)新肉絲口感偏爽，有咬口。醬汁嘅味道同未來熱狗腸炒意粉嘅味一樣，辣得黎帶有酸味，一入口都幾辣，食食下就覺得ok。呢款麵附有一碗素湯，比你撈麵食，食落有菇嘅味道，好似落咗菇粉或香菇去煮。如果覺得太辣都可撈埋湯黎食，咁樣食又有另一種味道。未來水餃淮山麵配響鈴 ($62)未來水餃有得揀配新豬肉黑椒香菇水餃或新豬肉紫甘藍粟米水餃，我哋就揀咗紫甘藍水餃。感覺一般，我唔係好食到紫甘藍嘅味道。未來豬柳漢堡配薯條 (原價: $88；優惠: $44)今次係我第2次食未來豬柳漢堡，今次材料比上次更豐富，多咗純素芝士同炒雜菌，食材夾之餘口感更豐富。而且依家單點漢堡有半價優惠。