東記上海麵

營業中

休息中

大埔嘅粉麵店一直以來都開到成行成市，百花齊放。熟食中心嘅粉麵檔更加係聚首一堂。 東記上海麵一直以炸豬扒麵作招牌菜，由熟食中心開到落地舖。細個讀書嘅時候經常都會去，因為大件夾抵食，一碗竹筍豬扒粗麵，大滿足。 今時今日黎到地舖，舖頭用左懷舊嘅港式裝修，有鐵閘有摺枱，希望營造出昔日大牌檔嘅感覺。餐具亦都係同往時一樣。 竹筍豬扒粗麵，炸豬扒大大件，竹筍蓋過碗面，大量蔥花再加兩條菜。味道同賣相都看似同熟食中心嘅一樣，只可惜炸豬扒不熱不脆，實在有點失色。一次就可能唔好彩，但係事不過三，我兩個月內先後食過三次，仍然係有同一結果（另類維持水準？），未有勇氣食第四次。 公道啲講，無比較可能無傷害，當你曾經食過熱辣辣好脆口嘅炸豬扒就明白我點解咁失望。唔係唔好食，只係無左昔日喺熟食中心嘅驚艷。 名物還名物，出名快，不過係沉得快（笑）。