明珠閣 (已結業)

之前係沙田閒逛時隨時搵一間食個下午茶就入左明珠閣，發現下午茶扺食又大份，今日趁住又去沙田行街就同老公二人決定試埋個晚試。位置方便，沙田火車站一出行幾分鐘就是。店入算坐得舒適。今次嗌左個例湯，籠仔金銀蒜海蝦蒸飯，珍珠賽螃蟹。嗌例湯時侍應已通知冇晒湯渣問我介唔介意，我平時都少食湯渣冇乜所謂啦，今日係青紅蘿蔔湯，都仲有兩舊蘿蔔可以食下。首先黎左個蝦飯先，老公勁讚，好香蒜味，就算冇其他餸就咁食都唔會覺得寡呀。飯唔會太淋，蝦係彈牙唔會霉，份量唔細，足夠二人食。珍珠賽螃蟹我好鐘意食賽螃蟹，食過咁多間呢間係其中一間好好食，足料，好香。兩個人埋單$391，打包左湯同賽螃蟹聽日帶番工lunch食，圍番唔貴啦！