泛后甜品 (已結業)

食完晚飯，甜品癮起，好想食榴槤嘅情況下，第一時間走左去B仔⋯點知答案係冇榴槤甜品⋯唔係第一次話冇，依家榴槤短缺咩？如果「貓山皇」有開，我就唔使搵阿B仔喇⋯結果走去佢對家糖水鋪「泛后」撞下彩啦，答案係有嘅!地方都頗為逼，坐低之後，同後面嘅客差啲背貼背，出入都唔係幾方便，但都ok嘅。落單點左一個楊枝金露同一個榴槤班戟，正！楊枝金露好足料，份量唔會太稀亦唔會太「杰」，好易入口，西米粒粒分明，芒果好香甜，正！榴槤班戟外皮好靚，有花紋咖！煙韌得嚟感覺好新鮮，內餡忌廉同榴槤比例啱啱好，榴槤啖啖肉，好香好甜，好滿足！所以話，小店唔會比大店差，用心製作係對客人嘅一大尊重。