利寶閣 (已結業)

飲茶通常都係散嗌多，閒閒地都人均百幾蚊，今次利寶閣推出午巿點心放題，都係比平時貴少少，但就可以任叫任食，唔洗就住就住。點心放題嘅款式都非常多，食開嘅蝦餃燒賣就不在話下，廚點特點呢d平時唔係好捨得嗌嘅都可以任叫，真係好抵。惠顧午巿放題，酒樓會送你一份鮑魚酥同灌湯餃，淨係呢2樣都幾十蚊啦。鮑魚好彈牙，灌湯餃好足料。跟住就係瘋狂地叫點心，蝦餃，燒賣，芋盒，魚餅，食幾多個嗌幾多，唔洗好似平時人多時叫一籠唔夠分，叫多籠又多得滯嘅情況。酥皮叉燒包即叫即整，熱辣辣。蒸腸粉好滑，荷葉飯細細隻，好有荷香，又唔洗食咁多。百幾蚊放題可以食盡唔同款式，地方又好坐，啱晒家庭或者朋友聚會。