譽宴 (已結業)

譽宴同阿媽響黃大仙飲茶飲到厭，所以今日特登出嚟佐敦，睇下有咩新野食。響莊士敦廣場樓下研究左一陣，揀來揀去都唔知食乜好，於是阿媽就話都係去飲茶啦，所以我哋就揀咗間響2樓嘅譽宴試一試。因為譽宴係專門做婚宴嘅地方，所以一打開𨋢門嘅時候，覺得環境非常華麗而雅緻，坐得舒服自然食得開心。我哋叫咗炸豆腐，點心拼盤，燒賣同埋牛柏葉。 令我最印象深刻嘅係佢嘅炸豆腐真係好好食！炸豆腐嘅外層鹹鹹地又夠脆，而內層好似山水豆腐花咁滑溜，呢碟屬於廚小嘅點心，都只係30幾蚊，而且份量好多，算係好抵食！ 另一個抵食嘅一定係點心拼盤！點心拼盤來包括兩個流沙包，兩粒粉果同兩粒蝦餃。 流沙包內層非常流沙，但入面嘅流沙餡料好明顯地會見到有一層油分開咗出嚟，所以為咗保持身型嘅關係，我都倒左面果層油先至食，不過味道係好食嘅，甜甜地之中又有啲蛋黃嘅香味，重點係夠熱辣辣，大家記得趁熱食！