元札幌拉麵 (宇晴軒商場) (已結業)

依間元札幌拉麵位於荔枝角四小龍依個位，午餐價錢對於打工仔黎講算略貴，仲要加埋一，但叫做去唔到旅行，都可以食下啲日本嘢減下壓咁。同同事一人叫左一個自選三寶套餐，可以揀個拉麵，再配個小食同支裝汽水，我就叫咗個牛油拉麵，佢就叫左個Ankake 濃湯拉麵。再配埋個燒雞翼同可樂，食完真係飽到成個晏就唔想做野。拉麵份量好足，仲有荀、芽菜同海帶，配料十足，湯底都偏向香港口味，唔會過鹹。而佢啲小食，除咗雞翼仲有好多唔同嘅選擇，生嘅有三文魚刺身，蟹籽沙律，熟嘅有煎餃子，炸豆腐，而個人最欣賞就係佢啲燒物，燒雞翼、燒雞軟骨同燒多春魚等即叫即燒，雞翼仲會拆開咗，食都方便啲～疫情期間，入店前會量體溫依啲就基本嘢啦，但佢仲會俾多個口罩你，依個就真係加分位啦