阿嫲現烤手工蛋糕 (已搬遷) 新店位置

我唸台式古早味蛋糕幾年前開始係香港興起, 我一直都無咩興趣試, 一黎我比較鍾意食🍰忌廉蛋糕, 二黎佢既外表令我唸起我細個成日食, 食到怕怕既紙包蛋糕。直至有一次媽咪買左個原味比我仔食, 從而令我對佢改觀, 原來只要用心選材和制作, 就算看似最簡單既食物都可以咁好味。台式古早味蛋糕我大概食過5, 6間, 暫時覺得最好味既係呢間 - 阿嫲現烤手工蛋糕。佢地既古早味蛋糕口感鬆軟, 充滿蛋香味。仲有唔知有冇人好似我咁食蛋糕最鐘意食佢面嗰層金黃色既皮, 係整個蛋糕烤焗得最香既部份。但唔知點解有D蛋糕店焗出黎既蛋糕面只有顏色但沒有烤焗過的香氣, 而阿嫲現烤手工蛋糕就做得非常好。我地買左金叵羅, 我唸香港既蛋糕店應該無幾多間會用土鳳梨蓉做蛋糕既內餡, 我覺得土鳳梨蓉既微酸同蛋糕既香甜真係好夾, 令整個蛋糕感覺甜而不膩。再加入柔軟而煙韌既麻糬, 令口感更豐富, 有加分效果。店員態度親切有禮, 每次去買都笑面盈盈咁介紹佢地既產品。