影片
更多
2024-09-25
1362 瀏覽
無意中見到某媒體上有人報料，中環歌賦街開左間新拉麵店，有我一直好想試，而响香港又難會搵到嘅昆布水沾麵🍜咁仲等咩，衝啦喂！醬油昆布水沾麵🍜追加盛盒🥩🥚香味 (5/5) - 沾汁嘅醬油香同其它店聞到嘅香味差距頗大，比較優雅，而且煙燻味極濃，論香味真係冇野彈，令第一印象非常好。醬油沾汁 (4.5/5) - 先講顏色，以醬油沾汁來講，佢唔算深色，屬紅茶色，清澈，上面浮嘅油清楚見到，上面仲有蔥，賣相冇得輸。沾汁嘅味道亦相當好，濃度鹹度剛好，醬油嘅味道好特別，唔係大眾貨色，感覺高雅。加埋煙燻味嘅加持，呢個沾汁我認為近乎完美。唯一少扣分嘅係同用餐體驗有關，稍後講。昆布水 (3/5) - 我第一次試昆布水，唔太知用咩標準去比分。我比3分嘅原因係，昆布水本身近乎係冇乜味，佢一如所料咁，質地相當之黏痴痴，有d似秋葵入面d肉嘅質地。但，稠而不濃，冇乜味道嘅情況下，我認為佢存在嘅價值就只係為左提升口感，而呢件事佢係做到嘅。麵條 (3/5) - 幼面，偏白色，小曲。麵條並唔係一般拉麵店會遇到，用小麥粉造嘅麵，呢款麵本身冇乜味，有d似日式素麵。口感方面非常煙韌，似食緊韓式嘅水冷麵。無論我係就咁食，加岩鹽食，或沾落
醬油昆布水沾麵🍜追加盛盒🥩🥚
醬油昆布水沾麵🍜追加盛盒🥩🥚
$178
405 瀏覽
0 讚好
0 留言
香味 (5/5) - 沾汁嘅醬油香同其它店聞到嘅香味差距頗大，比較優雅，而且煙燻味極濃，論香味真係冇野彈，令第一印象非常好。
醬油沾汁 (4.5/5) - 先講顏色，以醬油沾汁來講，佢唔算深色，屬紅茶色，清澈，上面浮嘅油清楚見到，上面仲有蔥，賣相冇得輸。沾汁嘅味道亦相當好，濃度鹹度剛好，醬油嘅味道好特別，唔係大眾貨色，感覺高雅。加埋煙燻味嘅加持，呢個沾汁我認為近乎完美。唯一少扣分嘅係同用餐體驗有關，稍後講。
昆布水 (3/5) - 我第一次試昆布水，唔太知用咩標準去比分。我比3分嘅原因係，昆布水本身近乎係冇乜味，佢一如所料咁，質地相當之黏痴痴，有d似秋葵入面d肉嘅質地。但，稠而不濃，冇乜味道嘅情況下，我認為佢存在嘅價值就只係為左提升口感，而呢件事佢係做到嘅。
麵條 (3/5) - 幼面，偏白色，小曲。麵條並唔係一般拉麵店會遇到，用小麥粉造嘅麵，呢款麵本身冇乜味，有d似日式素麵。口感方面非常煙韌，似食緊韓式嘅水冷麵。無論我係就咁食，加岩鹽食，或沾落去個沾汁道食都好，除左煙韌口感，同昆布水嘅黏之外，我就食唔出任何味道了。
呢個係岩鹽，鹹味比較清新。
配料 (4.5/5) - 呢份配料，叉燒，蛋同荀都係要額外叫嘅（盛盒）。
盛盒入面，叉燒有兩款，用左應該係豬里脊，同五花肉。因為有煙燻過，上菜前亦有用火槍燒過，香味係非常之好，味道亦好好。唯一少扣分係，呢兩款肉無論係烹調方式，形狀，大小，厚薄，近乎係一樣，口感亦相近。我真心食吓食吓，唔記得左自己食緊邊款肉。
荀同蛋方面，穩陣，中上。蛋嘅生熟度控制得好好，少少流心，可惜嘅係，我寧願佢唔預先切開，隻蛋若果响自己口中爆漿，感覺會更好。
另外一提，沾汁入面都有一款薄切豬肉，份量都唔少架喎，味道就可以啦（同盛盒入面兩款叉燒當然係冇得比啦），算加左誠意分。
整體 - 值得推薦 👍👍👍👍
講真，呢間咁高級嘅拉麵店，坐落中環拉麵激戰區，以佢嘅服務，店內環境，同碗沾麵本身，雖然佢定價都頗高，但我認為都有數圍，對得住個價錢。
題外話/補充資料：
有一樣野不得不提，昆布水沾麵同一般沾麵玩法有一樣野唔同，食到尾係冇得話加湯去稀釋個沾汁，而係要用食淨嘅昆布水倒落去。好彩，我臨尾都有淨昆布水，不過，一來，我淨返嘅昆布水唔多，唔足以令個汁足夠被溝稀，仲係頗鹹，二來，昆布水令成個醬油湯變得好杰，食到底會覺得膩，我寧願佢加普通湯落去，溝稀同溝薄佢，埋尾會更清爽，體驗會更多個層次。因此，個湯我係飲唔晒，唔係飽，係太厚太杰太鹹，真係飲唔到底。原先個湯係好好味，少少因此而浪費左。
(以上食評乃用戶個人意見 , 並不代表OpenRice之觀點。)
張貼
