Hugo Le Resto Grill (已結業)

今日萬聖節，夜晚經過銅鑼灣怡和街，見到樓下有個餐牌幾吸引，有鐵板牛扒、ribs、鵝肝炒飯等等，仲有沙律吧同龍蝦湯。所以就膽粗粗咁上去試吓。一上到去發現間野個情調都幾好，喺銅鑼灣好難搵到一間咁spacious嘅扒房，仲好好彩佢安排我哋坐卡位，嗰度你簡直瞓喺度都得。個景仲可以望住恆隆中心，ok la。其實佢個餐牌都有好多選擇，咁我哋兩個人最後揀咗一個燒豬仔骨同埋鵝肝炒飯。前菜可以去沙律吧食，而且送個龍蝦湯，沙律吧選擇都唔少，而個龍蝦湯呢都十分creamy，亦幾有龍蝦味。個燒豬仔骨呢都幾juicy，而且啲醬配合得唔錯，味道不俗。而個鵝肝炒飯啲鵝肝係眼見到一粒粒嘅，唔似其他嗰啲係好粹，鵝肝都炒得幾香，最後佢仲送咗個甜品俾我哋，係個檸檬蛋糕，幾fresh。佢好就好在個位置喺銅鑼灣中央，下次係銅鑼灣諗唔到食咩都可以再去。