星怡

營業中

休息中

上星期小朋友去同學仔屋企開生日會，之後都差唔多夜晚費事返屋企煮飯，所以喺附近搵餐廳食飯，見到門面諗住都係一間普通茶餐廳，但入咗去餐廳見到餐廳環境都幾靚，望下餐牌先知道原來係食星加坡野，但見到價錢唔貴，一於試吓，我哋兩個人叫咗個二人套餐，我哋揀咗黃金魚皮，虎蝦，雞髀椰漿飯，另外點多左份咖央多士。首先碟黃金魚皮，即係鹹蛋黃魚皮，勁好食，好香鹹蛋香味，好脆口，少少辣辣地，用嚟送啤酒或其他野飲都好一流。麥皮老虎蝦，雖然得兩隻，但係真係好大隻，而且非常彈牙，仲見到隻蝦好多膏好香好好味。雞髀椰漿飯一上台真係嚇我一跳，因為隻雞髀勁大隻，外皮炸得好香脆，但雞髀肉依然好多肉汁，椰漿飯好香配埋辣魚仔同花生一齊食，超級開胃。另外咖央多士大大嚿牛油仲要厚切，卜卜脆，外脆內軟牛油勁香，好似食緊雪糕多士一樣，勁好食。兩個人食到抱住個肚咁埋單，差啲唔記得咗有個甜品，係斑蘭口味嘅糯米糍，好香好好味，入面暖暖地，唔會太甜。埋單仲要唔貴，下次有機會一定會再嚟呢間餐廳。