和牛燒肉‧純 (已搬遷) 新店位置

為左慶祝同某人既一週年，揀左好耐揀左呢間和牛燒肉·純黎滿足呢個食肉怪既願望。呢間都好有人氣，加埋空間唔大，如果大時大節都係提早訂位穩陣d。呢間舖頭以烤肉為主，係日本農業協會直營既店，集中左日本最高質既牛肉。有曬指示教你點分肉，甚至乎點分「A級和牛」。好野唔怕貴，好味就洗錢都洗得開心，所以就決定叫最貴$1980佐賀牛厚切西冷稀有部分盛合，包括一塊厚切西冷，三筋牛排肉、三角牛排肉同厚切牛排肉。睇睇每塊肉雪花幾細膩，兩塊稀少部分既雪花豐富，油脂比起西冷更加密集。肉質細膩，咬入口肉汁係舌頭慢慢蔓延到喉嚨。吃落去滿嘴油香，不過正正係呢種脂肪香味，配飯黎食，飯粒同油脂混合，完全係天堂。另外我地又加多一份牛舌，勁厚切，每塊介開格紋，灑左少少鹽係上面。因為牛舌好厚，所以記得燒前四邊都要燒埋，鎖住肉汁之餘亦令佢熟埋。入面好爽好有牛味，但係中間又好嫩。燒肉可以點燒汁，附上既燒汁並唔會太鹹，唔會掩蓋左牛肉味，但係我更佳Enjoy每啖原味牛汁既滋味。呢餐食落黎人均真係千幾蚊，但係某人食得開心，我拎銀包都拎得開心！