鍋居火鍋專門店 (已結業)

今日勁想打邊爐🍲，想就要做，所以放工夜晚就去食，揾左間屋企附近既，近近地食完返屋企。去到餐廳，入面差唔多坐滿，好彩一早book左位。同女朋友兩個食得唔多，亦都唔想做大哂鬼，所以只係叫左一個鴛鴦鍋，一邊係麻辣湯底，另一邊係芫荽湯底，熱氣，清熱氣，啱啱好打個和🤣。食物叫左炸魚皮、響鈴、手切牛肉細份、新鮮螺肉、墨魚滑、韭菜豬肉餃、仲有油麥菜，同埋兩隻避風塘鮑魚，熱食既，肚餓諗住食左啲熟食先。食物都唔算耐就黎到，首先係炸魚皮、響鈴、油麥菜，有時出面啲響鈴好似擺左好耐，淋哂，好彩呢度嘅響鈴仲脆，魚皮都係新鮮炸既，唔錯；油麥菜正常，至少乾乾淨淨。跟住手切牛肉、螺肉、墨魚滑都上枱，咁我緊係即刻淥一淥手切牛肉，牛味濃郁，冇筋，肥瘦適中，本地牛真心好食😋 螺肉都好新鮮，鮮味十足又甜，推介。螺肉食完再食墨魚滑，就感覺被比下去，雖然都好食，但螺肉鮮甜好多。跟住韭菜豬肉餃，睇賣相都知係人手包，至於係咪自家製就唔知，但食落算啖啖肉，冇乜味精，唔錯，可試。最後先上避風塘鮑魚，原本係諗住未食得住，先食左個熟食鮑魚，點知最尾先黎，不過唔緊要，一上就當然要即食，係新鮮既，但感覺煮得熟得濟，有啲韌，所以可試可不試。