翠華餐廳 (已結業)

喺附近諗唔到食乜好，不如就食翠華啦！翠華比我嘅印象一向都係貴價嘅茶餐廳，都係一般茶餐廳野，但價錢就貴兩三成。今日心血來潮，就走入去幫襯下啦。同老婆兩個人叫咗兩個餐，都係基本野，一個鐵板什扒，一個焗豬扒飯。鐵板什扒非常足料，大大份，有齊雞扒、牛扒、豬扒、腸仔、煙肉、火腿、薯菜。三種扒類都非常新鮮，黑椒汁好味，當中最驚喜嘅就係牛扒同薯菜。牛扒係典型茶餐廳牛扒，驚喜在佢係厚切嘅。至於薯菜係薯角，冇諗過茶餐廳嘅配菜除咗裝飾之外，都係香脆好食嘅。老婆嘅焗豬扒飯，都係好足料，有整整一大塊厚厚嘅豬扒。個汁有好濃嘅番茄味，係用新鮮蕃茄整成嘅，伴一大塊厚切番茄，都幾有誠意。焗飯表面，仲鋪滿芝士，焗溶左，更香濃好味。食完呢餐之後，令我對翠華都有少少改觀。原來佢唔單止價格比普通茶餐廳貴多少，質素都有返咁上下保證，確實係比一般嘅茶餐廳出色。