影片
更多
2022-11-08
94 瀏覽
最近幾個月一直都減緊肥，好耐未試過去食烤肉，仲要係放題。呢啲行quota制嘅嘢梗係要揀一間最好嘅嚟食啦。呢間日式烤肉每一個set都超過100款食物，除咗肉類之外更加有唔少嘅熟食，壽司，捲物，一品料理等等，其實120分鐘真係唔夠時間食咁多嘢，因為佢嘅選擇實在太多啦。最重要嘅係佢呢度嘅每一款和牛，無論係邊種等級，都絕對係有返咁上下質素。我哋揀咗set B嘅嚴選牛肉，可以揀嘅牛肉有好多唔同嘅部位，同埋唔同嘅等級。呢個set本身就會包咗一架船同埋一個桶俾你試晒佢哋唔同嘅普通級別肉類先，除咗牛之外當中仲有雞，豬同海鮮，然之後你就可以在自己望住自己嘅喜好去加單。當中我哋自己加咗特選級別嘅牛肋肉，牛舌同牛里脊，佢呢度嘅牛舌係厚切，比你更加容易掌握佢嘅熟成度，唔會因為太薄容易燒到老晒。另外我覺得最正嘅係佢個大判壽喜燒牛里脊，牛味好夠濃，平時咁大塊好似床單咁都係攞嚟做壽喜燒，但原來攞嚟燒都好正。除咗燒嘅肉類之外佢呢度仲有牛刺身可以試，佢本身有三款牛刺身，而我自己覺得呢款係最好食。因為佢撈完啲日本雞蛋之後，沾滿晒蛋黃漿真係好香好滑。除咗一大堆嘅肉類之外，佢呢度嘅海鮮種類都唔少，不過相比起呢度嘅牛肉，佢啲海
呢啲行quota制嘅嘢梗係要揀一間最好嘅嚟食啦。呢間日式烤肉每一個set都超過100款食物，除咗肉類之外更加有唔少嘅熟食，壽司，捲物，一品料理等等，其實120分鐘真係唔夠時間食咁多嘢，因為佢嘅選擇實在太多啦。最重要嘅係佢呢度嘅每一款和牛，無論係邊種等級，都絕對係有返咁上下質素。
我哋揀咗set B嘅嚴選牛肉，可以揀嘅牛肉有好多唔同嘅部位，同埋唔同嘅等級。呢個set本身就會包咗一架船同埋一個桶俾你試晒佢哋唔同嘅普通級別肉類先，除咗牛之外當中仲有雞，豬同海鮮，然之後你就可以在自己望住自己嘅喜好去加單。
當中我哋自己加咗特選級別嘅牛肋肉，牛舌同牛里脊，佢呢度嘅牛舌係厚切，比你更加容易掌握佢嘅熟成度，唔會因為太薄容易燒到老晒。
另外我覺得最正嘅係佢個大判壽喜燒牛里脊，牛味好夠濃，平時咁大塊好似床單咁都係攞嚟做壽喜燒，但原來攞嚟燒都好正。
除咗燒嘅肉類之外佢呢度仲有牛刺身可以試，佢本身有三款牛刺身，而我自己覺得呢款係最好食。
因為佢撈完啲日本雞蛋之後，沾滿晒蛋黃漿真係好香好滑。
除咗一大堆嘅肉類之外，佢呢度嘅海鮮種類都唔少，不過相比起呢度嘅牛肉，佢啲海鮮就真係遜色不少，佢啲蝦唔夠新鮮所以唔夠彈牙，但係啲帶子都唔錯嘅，但係最好就要食佢有調味嘅嗰一款。
另外蔬菜類當然唔少得啲菇類啦，同埋仲有一啲茄子同埋意大利青瓜，佢個牛油嘢菇都唔錯。
另外佢有好多唔同嘅熟悉同埋冷盤前菜，冷盤前菜我就唔多介紹啦，不過食到膩膩地，我哋叫咗佢兩個湯嚟飲，分別係蛋花湯同埋海帶湯，清清地解下膩都唔錯㗎。
喺飲品方面其實佢都真係好多選擇，除咗日常見到嘅罐裝飲品之外，佢哋呢度仲有好多款唔同嘅特調特飲，但係因為肚量有限，我只係試咗其中一款，都真係唔錯㗎，絕對唔係藥水味。
最重要嘅係佢呢度嘅雪糕甜品唔係好似出邊咁行，食嚟食去都係得Häagen-Dazs或者Dreyer，而係日本有名嘅明治，有齊晒咁多隻唔同嘅味道，而我就揀咗個蜜桃烏龍茶，唔會太甜又好有茶嘅香味，岩晒我。
最後我想讚吓佢呢間舖頭嘅裝修，最特別係喺中間嘅位置會有一條食物嘅運輸帶，你嗌咗嘢食會自動送到嚟嘅枱邊，然後你就可以自己拎，對我來講覺得好新奇，又有得玩又有得食。裝修方面簡潔得來感覺好寬敞，而且粉色嘅色調亦都令女孩子感覺幾舒服，最重要係我覺得佢哋個廁所都靚過人。不過呢度唯一嘅敗筆就係呢度嘅職員態度真係唔係咁好，俾人嘅感覺唔係太有善，除咗冇乜笑容之外，同你講嘢嘅態度一啲都唔親切，而且19分要交檯，18分已經會嚟叫你離座。幸好過呢度嘅嘢食真係有返咁上下質素，如果唔係真係未必會再嚟。
張貼
