餃掂手工餃子雲吞專門店

上次食過荔枝角間分店，咁啱今日去太子始創嗰邊買嘢，見到呢間餃掂快線，諗起上次食完覺得幾高質，今次同朋友又再食多次。今次encore番龍鳳松茸湯餃，野生松茸剪素餃，一份上湯松茸時蔬，飲品叫咗一杯凍蜂蜜檸檬薏米同一杯熱嘅自家制山楂雪梨。總括嚟講佢啲餃子皮薄餡靚，份量偏大隻嘅。堂食仲有醃蘿蔔食，同埋都有兩款醬揀。食物質素都係咁好食，先講個龍鳳松茸湯餃，咬落去啖啖肉，分湯上，但係唔係烚到乾身，仲充滿肉汁，連埋啖湯去食，充滿咗肉汁同埋松茸嘅味道。另外煎餃都係咁好食，真係好鍾意食素餃，佢嘅餡料都好充足，食到有唔同種類嘅蔬菜，超健康。飲品方面，兩杯都飲得出係健康同養生，啱晒秋天滋潤身體。