點心廊 (已結業)

旺角區搵到間精緻點心，食物質素高，服務好，又坐得好，而且價錢合理☺️今日同媽咪去咗飲茶，去到環境幾靚，而且仲有卡位坐。茶都有唔少選擇，我哋揀咗桂花烏龍😃餐牌上面有好多唔同嘅點心，由於花多眼亂，咩都想食，我哋就叫咗個點心拼盤😉乜都有啲可以食，再加咗個鳳爪排骨飯🙂點心拼盤整得好靚，而且味道仲好食！先食咗金箔墨汁蟹粉鮮蝦餃，用墨汁嘅皮包成，而且入面啲蝦大大隻，新鮮爽口，唔淨止賣相靚，味道仲一流👍🏻海膽鳳眼餃面上有一排海膽，而且幾甜；入面啲蝦都係又大又新鮮☺️好食呀！原隻鮑魚撻食落去鮑魚夠味，而且個撻皮係脆嘅，好新鮮。黃金啤梨鹹水角，個賣相整成啤梨咁，好得意，炸得好脆，入面有夠多餡，連我一向麻麻地鹹水角都覺得好食。燕窩撻整得好靚，面上有燕窩，而且下面係蛋撻，有兩重口感。黑白芝麻煎堆仔，入面充滿芝麻，芝麻味好香；個皮脆得嚟煙煙韌韌😋另外叫咗個鳳爪排骨飯，係用石鍋裝住，所以可以保持熱度。食到最後仲有少少飯焦🤓排骨份量都好多，鳳爪都有三隻，抵食！