OWO

營業中

休息中

相隔半年再拜訪，原來好之上仲可以再進步。半年前店舖熟客朋友帶我到呢間咖啡店，咖啡對我嚟講屬於重口味，很強烈的Nutty咖啡，有層次及會在口腔留下淡淡的酒香，不錯。食物方面當時以All day breakfast 為主，份量適中，食物質素亦非常高。當時與店主傾談，佢話由於煮食空間不大，唯有選用最優質食材，配以簡單烹調方法，先可以提供到符合佢標準嘅食品。當時我戲言，話如果佢哋可以出到意粉，一定會做得好出色。冇諗過店主真係坐言起行，用咗半年嘅時間研發咗兩款，佢認為合格唔失禮嘅意粉出嚟，仲邀請我返去試一試。一試，何止合格，兩款意粉質素之高，令好多餐廳都相形見絀。一款破格地用甜椒做醬配合辣肉腸烹調嘅意粉，清新得嚟帶一點點辣，雖然是忌廉汁，但清新易入口。另一款蟹肉意粉，就不用多講，一上枱蟹肉嘅香味已經撲鼻而來，配以蒜油烹調，減卻了蟹肉上嘅腥味，仲令鮮味更加突出。店主對食品飲品嘅高要求，响而家嘅香港，已經好難搵到，希望可以保持落去，期待下一次再有新產品推出。