翠華餐廳 (已結業)

講起翠華，太公印象最深刻的，是其奶油豬 (奶油豬仔飽)；每次來，都不敵其誘惑。是日午膳也出現相同情況；和同事去翠華，太公攞住個餐牌，由第一頁揭到最尾果頁，再由最尾果頁揭返第一頁，來回幾次，牆上餐牌又望咗無數次，同事都叫好午餐，連餐湯都送上，我仍然決定唔到食乜。最後，決定：我要奶油豬 + 奶茶！最多唔夠食掃街！新蒲崗這家翠華之前未光顧過；猶幸，這奶油豬水準相當平穩 – 烘得鬆脆的豬仔包之上，趁熱塗上份量不少的牛油，再加上一層煉奶；牛油都融於豬仔包裏，加上煉奶，望落已是嬌艷欲滴，咬落更是香甜鬆脆又美味。不過奶茶就唔多好飲, 茶味唔夠濃但奶都唔算香滑，唔係我杯茶奶油豬此物，有如魔鬼般，邪惡得很 (美味背後, 有如此多的牛油和煉奶)；但偶一為之，絕對能令人有回味無窮，心曠神怡之感！