莆田 (已結業)

「莆田」呢個名聽過好多次，米芝蓮一星既新加坡福建菜，食就第一次食。7點幾去到有少量座位，都幾多家庭去食。裝潢設計幾新穎，以藍色同木做配搭，光線幾舒服。我地2個人叫左4個菜式：1. 冰爽酒糟蟶子：排得好整齊，大約有16隻，名副其實係又冰又爽，酒味唔會過重，辟左蟶子腥味，又帶出到佢既鮮甜。2. 鐵板鹽焗蟶子：個人認為呢個製法比頭先既冰爽酒糟蟶子更鮮甜、更好味！用左乾花椒調味，個底鋪滿粗鹽，熱辣辣用鐵板上，食落更滋味。3. 百秒黃花魚：條魚整得岩岩好熟，肉好嫩滑，鮮味十足，個魚湯有好多薑粒用黎去腥味，擺盤亦好靚，將條魚開邊方便易食，連原本唔太好魚既男朋友都讚好味，應該好多骨膠原，對皮膚好。4. 興化米粉：用左超級多料黎炒既超幼米粉，材料包括：五花腩絲、蝦仁、白菜、紫菜、花生、豆卜、冬菇、芹菜、蜆，所以個米粉吸晒d料既味，食落齒甲留香，如果有少少汁應該仲好味。前菜有個蘿蔔頭，好爽口。侍應仲為我地揀左菊花杞子茶，飲落好清香，又有清肝明目既效用。總結：呢餐食得好滿足，2個人食會太飽，建議可以同家人一齊去食。