鹿鳴居 (已結業)

Item: 鹿鳴居
Rating: 2
Author: 奧志雷

Deers Restaurant

此店已改名為新鹿鳴居

16 食評

味道

環境

服務

衛生

抵食

大埔

$51-100

潮州菜火鍋粥品大牌檔

奧志雷

等級4

2.1K

酒後又亂性，只怪飲醉酒 ﹗在人工智能 AI 系統下再次大散金錢，大大力 order 豐富宵夜呢。夜晚九點半開始飲，未到一點已經醉爆，但依然渾身是勁，仲識賭錢、食宵夜。腦部人手操做已關掉，記憶體同時都關掉，啟動 AI 系統打電話去叫外賣，再加賭 poker 輸左幾千蚊，大出血之夜 ﹗賠了夫人又折兵 ﹗

等左 45 分鐘外賣先送到，而且凍鬼晒，只係微暖，依家食冷飯菜汁咩 ﹗離晒譜，火到黎﹗打電話催外賣，老闆娘話師傅食緊宵夜要遲少少唔好意思，都無緊要 ﹗但外賣送到黎凍晒，唔係熱辣辣就唔得啦 ﹗好明顯一早煮好等埋其他 order 先出貨，太可惡 ﹗

飲醉酒第 12 個熾天使出現，大食 AI 啟動 ﹗狂 order、狂食野，食到停唔到﹗飲左一支半紅酒加 shoot Jack Daniel 又開始 high high 地，失控地瘋狂點菜 ﹗先黎 5 道菜食住先，轉頭再 order 多 4 個啦，9 道先夠派頭麻 ﹗叫成 9 道菜，都唔記得幾多錢埋單咯﹗我醒左幾十蚊小費過佢，外賣阿姐勁開心，呵呵 ﹗

狂食白灼東風螺，近來真係食上癮 ﹗壯陽東風螺是也。我最喜愛既菜色，簡單又好食，夠鮮甜。即叫即烚，熱騰騰送到，熱到只可以免強拿起呢。好大隻啖啖肉一挑射汁，食到成手濕晒，狼狽得黎食得開心暢快 ﹗烚得剛剛好，完全不韌無過火無縮水。不乾不鞋，螺頭脆、螺身滑、螺尾棉，好好味 ﹗點醬惹味好食，不點醬原汁原味同樣清新可口。

雞絲海蜇，好奇下叫黎試試乍。微暖不熱的溫度，怪怪的。鞋鞋的雞肉撈埋半腍半爽海蜇淋上麻油再洒上芝麻，一般的唔難食，叫做試過囉。感覺似上海菜雞絲粉皮的變奏，一個係麻醬，另一個係麻油。

蒜蓉粉絲蒸象拔蚌仔，蒸得有少許過火，熟了一點點、韌了一點點，幸好還在可接受度，微彈帶汁。讓索盡螺汁粉絲捲著吃，夾雜蒜蓉、香蔥、辣椒，依然食得津津有味。

椒鹽豬扒，炸蒜非常香口，我想要碗河粉撈黎食啊 ﹗不過豬扒炸到乾硬又鞋，趙到有點刮口添。茄子炆牛仔骨，嫩滑茄子肉完全吸收牛仔骨精華，熱騰騰送入口，牛味濃又醬汁香，好味到打冷陣。牛仔骨醃味濃郁而不嗆不濁，質地有咬口，滿足。

枝竹羊腩火鍋，連羊腩火鍋我地都外賣，認真食得夠招積喇 ﹗堅係羊腩喎，啖啖嫩肉，骨少肉多開心死 ﹗唔會肥騰騰，又唔會肥膏一舊舊，羶香不嗅不腥不過份。炆得軟腍，入口感覺鬆軟，羊皮彈彈而黏著薄薄羊脂，泛著清爽淺淺羶味。

湯汁加入大量配菜餚成，特別濃郁帶甜帶羊肉香。羊腩跟腐乳醬簡直絕配，是但無左邊個都唔得，實在太好味喇 ﹗一份羊腩兩個食就差唔多，依家五六個人點夠分喎，完全唔夠喉，唔會少食多知味囉。送上爽嫩唐生菜。我喜歡待菜葉索晒羊肉湯先捲著大量腐乳醬入口。唐生菜爽到索索聲又充滿水份，跟羊腩湯既味道特別夾，食到唔停口 ﹗

蒜蓉蒸茄子，大量蓉蒜辣椒將茄子鋪得滿滿已被軟棉茄肉找得緊緊，整件啪入口，半滴精華都不漏地盡收肚裡去 ﹗辛辣香甜蒜蓉，香氣樸鼻，可口極致。

蒜蓉蒸開邊中蝦，游水蝦超級新鮮無得彈，香辣豉油蒜蓉浸著鮮蝦肉直衝入口，跟舌頭、牙齒不停糾纏 ﹗蝦爽味鮮跟蒜香翻騰著，美味啊 ﹗蝦汁已完全滲透入墊底粉絲之中，捲著蒜蓉啜晒入口，鮮甜惹味，好鬼正 ﹗

薑蔥炆美國桶蠔，只有桶蠔供應，沒有本地新鮮蠔呢。肥嘟嘟蠔肉夠實淨，全熟使到蠔味更香濃特出，煮得無過火無縮水。唯一我不喜歡的就是桶蠔裙邊太韌又有渣，食唔到呢。

淨豬紅，不辣的滷水汁較為清淡，幸好有椒椒油打救。結實淡味豬紅在辣椒油上打滾再入口，一咬爆開 ﹗外脆內滑，都滿意。夠熱就會好好食，無浸過火搞到鞋鞋硬硬就更好食。汁液四射，滷水味濃添一點微辣，溫度少少燙嘴更是美妙。我唔食韮菜的呢，想要生菜底。誰知老闆娘厭麻煩囉，死都唔肯幫我做，韮菜貴過生菜啦，加錢都唔肯 ﹗近來成日掛住豬紅，好耐無見喇 ﹗

菜膽雞半隻，真係咁多食？居然只賣剩半隻，點夠食呢？無辦法都要照叫架。勁孤寒，比得幾舊芥菜膽，又賣晒？非常乾腍甘甜好好味。但隻大肥雞肥騰騰，雞皮勁厚又收埋大量肥膏，食到成口油，雞肉又鞋又乾。雞湯芡調杰撻撻，做湯羮咩，試一次便夠。

椒鹽瀨尿蝦，炸得雖然有點油膩，但香噴噴 ﹗蒜香飄飄，還夾雜著炸蝦芬芳氣味，口水直流，我唔客氣喇 ﹗真係唔錯喎，蝦肉濕潤嫩滑結實，鮮甜無比可口，部份瀨尿蝦仲有甘香硬膏添呀，堅正 ﹗係細隻左少少囉。最初想食炸乳鴿架，賣晒之麻。點知推介瀨尿蝦，稱游水好新鮮生猛，就叫黎試試啦 ﹗諗深一層，我想食雀喎，關海鮮咩事呢？

勝瓜炒肉片，皮爽肉滑啊，肉汁滲入瓜肉特別香甜好味道，肉片炒得香口有趙頭，夾住勝瓜同吃，滋味無窮。近來經常腦裡面浮現依道菜，細細個時阿媽成日煮架呢。搞到我想食幾日架喇，所以專登操完泰拳返屋企沖個涼再走落街食野。

剁椒蒸雞，未試過想試試，order 前已心諗會唔會又係比頭頭尾尾呢？點知真係估中左，全部都係雞背脊，仲有一隻雞翼加兩隻雞翼尖添 ﹗居然收 HKD60，係咪過份左呢 ﹗無味雪藏雞，骨多肉少、骨杉杉、肥騰騰、油淋淋，雞肉又鞋烚烚，以後要記得唔可以叫雞呢。

薑蔥爆田雞，最好食係白滑兩條腿，大腿肌肉結實勁彈，沾上微辛薑蔥芡非常可口。其他部份雖然肉不多，但同樣肉質滑滑的，損下汁、損下肉都別有一翻風味。

菠蘿生炒骨，突然好想食，好想食酸酸甜甜既食物 ﹗炸得外脆內嫩又啖啖肉，骨少肉多好滿足。鬆化外層索晒甜酸汁，還輕輕散發著青椒洋蔥獨特的味道，活腦醒神又開胃，越趙越想食。

紅酒焗蠔，伴碟西蘭花比焗蠔更好食喎 ﹗鮮甜多汁又爽脆，唔會腍劈劈或帶草清味道。蠔豉？那麼特別，還以為會用上本地生蠔或美國桶蠔添。生曬金蠔將鮮蠔味道完全鎖住在其中，一咬開甘甜無比，鬆化軟軟的質感非常舒服。紅酒汁泛出微弱葡萄酒香氣，還算可以。

椒絲腐乳生菜，有鑊氣，我鍾意 ﹗味道香濃，我喜歡﹗腐乳混辣椒夠惹味香濃，簡單又好好味 ﹗鮮爽到索索聲，勁脆又充成水份，掛上濃濃腐乳汁再夾埋椒絲絲大注大注地啜入口，食得夠霸氣，非常滿足呢。

中式牛柳，好耐無品嚐，突然好想食。熱辣辣酸味突出，最後帶一絲甜甜餘韻。肉質十分有咬口，給點牙力吧 ﹗牛味濃又醃味得宜，幾好食架喎。

白灼花螺，真係太新鮮太好味喇 ﹗要叫兩客先夠喉，連醬都可以慳返，鮮味非常，螺汁豐富而且爽彈無得彈，點可能停得口呀。比起東風螺細隻好多呢，雖然鮮味出眾亦彈牙多汁，但無咩肉食。半斤已經好多粒，要吉成幾十下好睏架麻，大隻的話只需吉十幾隻就完成啦 ﹗

專登 order 要大隻啲架，好新鮮爽甜，最緊要食到條尾呀，口感同味道同潤差不多，由細到大都掙住食架 ﹗九孔鮑又好、螺又好、帆立貝又好，有朋友仔唔食，比晒我唔好浪費呀，好味道 ﹗

豉椒炒蜆，真係唔好再叫喇，蜆肉細細粒勁削，仲完全無味道，完全無鮮味，淡而無味 ﹗一早汆完水備用，有 order 就落鑊兜均個汁，烚走晒鮮味同海水味。好明顯係汆完水再兜豉汁，一點味道也沒有，只有豉椒味，差差差 ﹗蜆肉雖嫩，不過質地似足趙緊香口膠。煮到過熟，really bad ﹗

炸雞軟骨，炸得乾爽香脆，難得不油膩，還可以。炸墨魚餅，毫不彈牙，腍劈劈，口感鬆散，微弱墨魚味道，算炸得鬆脆，沾上大量泰式雞醬唔難食。

椒鹽鮮魷，最愛鬆化不硬薄薄的炸漿溫柔地包著鮮魷，香口非常又微脆不刮口。魷味鮮甜超卓，彈彈質感中又帶少少嚥韌，掉在喼汁上打滾，讓喼汁滲透脆漿更是可口。

滷水鵝，好難一間潮州打冷既滷水鵝可以做得咁差 ﹗滷水不鮮甜又咸又濁，完全不香不甜美，鵝肉一夾即散，燉肉一樣，不嫩不滑不彈，鵝皮又腍劈劈，估計浸過火啦，好難食呢。

清蒸游水活石蚌，以前成日以為石蚌及筍殼係貝殼類，原來係魚黎架喎。游水海魚勁生猛，即叫即劏 ﹗鮮魚味道出眾，不能掩飾的美味，要成 HKD120 條架。啖啖肉無細骨，海魚味濃、肉質實淨，帶著魚汁豉油，滿意滿意。

芥菜豆腐魚頭湯，份量都唔少喎，足足一窩呢。熱騰騰，幾好飲喎，雖知味精不少。幸好魚頭都有肉食下，芥菜甘甜爽爽的，豆腐配上豉油都可以。

冬菇扒芥菜膽，芥菜非常鮮嫩多汁，甘甜無比，好食到不得了，搶呀 ﹗冬菇嫩滑爽口，彈到飛起，香菇味濃，食唔停口。