鹿鳴居 (已結業)

Item: 鹿鳴居
Rating: 3
Author: 奧志雷

Deers Restaurant

此店已改名為新鹿鳴居

16 食評

味道

環境

服務

衛生

抵食

大埔

$51-100

潮州菜火鍋粥品大牌檔

奧志雷

等級4

2.1K

今晚又係食自己，走落大埔買少少野就去 Baby 一齊叫外賣吧 ﹗最初諗住食旭川日本料理，最衰要外賣自取，懶得出去，叫返鹿明居算喇，送到上門又好味又經濟實惠。全部清晒一件不漏無浪費，Good ﹗一星期總有幾次叫鹿鳴居外賣，真係專用大廚呢。無他既，好食囉。食完晚飯，飲到醉醉地又係時候宵夜，兩點幾架喇 ﹗爆醉 AI 又運作，敲個鐘齊齊宵夜大食會啦 ﹗聽朝仲要返工呢，食飽飽就即閃。嘩，全部清晒無浪費，一滴都無剩 ﹗BBQ 戰士勁呀 ﹗

滷水鵝片大豆芽底，自從兩年前親身到訪堂食鵝片時咸鞋乾硬又散筲筲後，一直都唔敢再叫，非常有陰影 ﹗今晚破例比多次機會您，乖乖地呀 ﹗出乎意料，水準唔錯喎 ﹗滷水鵝片，不嫩不滑，但勝在結實有咬口，鵝味濃郁，合格。滷水清香無嗆喉，不過咸不過油，仲帶輕微甜味添。將鵝片沐浴在滷水汁之中，底面拖一拖就跣入口喇。厚薄尚為滿意，肉質有所進步，實而不華，結實中帶微滑，緩緩滲出肉汁，合格。

以後都唔要豆腐乾底喇，唔好食既，乾爭爭，有時仲有酸味添 ﹗大豆芽爽甜多汁，跟滷水味道非常爽，好味道。捲住肥美鵝片同吃，堅係如虎添翼，美味絕倫，非食不可 ﹗唔好同我掙呀 ﹗自從前排開始食得到芽菜、大豆芽，依家開始每次打冷食滷水鵝都必定要大豆芽底喇，因為大量水份又清爽，可以去一去油膩感覺。沾上滷水既大豆芽爽口甜美，配上質地幼細彈牙滑溜既鵝片同吃，那有難食的可能 ﹗濃而不嗆既滷水汁，大埔響噹噹，好味道呀 ﹗

滷水鵝腸，爽脆非常，一邊粗糙、一邊滑溜，多重口感佔上清香滷水，好味啊 ﹗紅腸墨魚，墨魚片不過不失啦，鮮甜嚥韌，我較喜歡爽脆墨魚鬚囉。紅腸皮脆肉香，不咸不嗆，合格。想起兒時半煎炸紅腸片，配豉油黎撈飯，外層微脆香口超好味呀 ﹗紅腸墨魚大路滿意，紅腸咸香夾著鮮味墨魚同吃係至高既享受。雖然墨魚並不是爽脆型，不過都彈牙入味，滿意。

菜膽雞半隻，無味雪藏大肥雞，肥騰騰、油淋淋，只係過過口癮吧，下次唔好喇。霸王雞半隻，我雖則無雞不歡，但依隻雞真係麻麻。大量薑蔥尖椒、豉油、熟油撈埋肥騰騰無味乾鞋雪藏雞，跟菜膽雞質數不相伯仲，不試也吧。都係食返啫啫雞或茄子雞，濃味送菜表現好一點。

炸乳鴿，穩陣可靠招排炸乳鴿，皮脆肉嫩不過咸，滷水味強勁得宜，滲入鴿肉之中，連骨子裡都充滿清香，推介。質數依舊啖啖肉輕滲肉汁，有趙口又不太乾硬，雖略有偏咸。炸出黎太深色影響賣相，啖啖肉最適合食肉獸，不過我都係厭佢太咸太濃味。時有失手既招牌菜，外皮味濃偏咸重口味，雖然係啖啖肉，但肉質有點乾鞋，免免強強乍喎。

白灼東風螺，簡單得黎又 no. 1 好食 ﹗夠新鮮夠鮮甜，海鮮香味十足，色香味有齊，彈牙脆口配埋甜辣醬夠晒喇 ﹗十分滿足。夠簡單又易做，較好鬧鐘掉去灼，夠鐘就撈起搞掂 ﹗海螺香味撲面而來，用牙簽小心翼翼地將螺頭、螺肉、內臟一併挑出，全隻掉入口唔好浪費 ﹗最愛食尾部既內臟，潤味濃厚、甘甜可口。有時挑唔出，都要用手狠狠地拍出黎呢，坊間傳聞尾部寒涼，有些人食左會肚痛，但我無有怕，民以食為天麻 ﹗沾上辣醬海鮮醬，美味無窮 ﹗鮮味多汁，一隻接一隻點停得口呀 ﹗

白灼東風螺，鮮甜、爽甜、香甜，無得輸 ﹗要 order 兩大碟先夠，因為次次大家都搶住食囉 ﹗誰知今次居然剩，真係估您唔到，係要掙食先開心既。鮮味強烈，多汁可口，配上甜辣醬勁惹味，傳說中仲有壯陽之效，個個掙住食啦。我最喜愛既東風螺呀 ﹗機乎每次都叫，大大隻又鮮味多汁。螺頭脆卜卜、螺身嚥韌、螺尾棉而黏，好好食。先挑大量螺肉留起再一次過倒入口，那種澎湃既衝擊直係無法形容呢 ﹗

沙嗲肥牛粉絲，唔鍾意撈勁多青紅椒粒同洋蔥囉，全部我都唔食架，揀死我咩。味道就好正喇，香辣沙嗲已被粉絲完全吸收，熱燙燙既粉絲、嚥韌既肥牛一齊大力不停啜入口，急流一樣直衝胃裡去，好味道，大滿足 ﹗

中式牛柳，走完油外層幾香口喎，軟棉牛扒撈上甜酸洋蔥汁，滿意。酸酸甜甜易入口，牛肉乸不正常地軟腍軟嘟嘟，港式別有一翻風味。食得鬼佬原味牛扒多，間中食下都幾過癮。師傅您今次失手喎，幸好尚可接受。酸酸甜甜牛柳，開胃菜。

菠蘿生炒排骨，好耐無食喇 ﹗原來史生唔食肉片勝瓜架，早講麻，好采生炒骨啱食啫。酸酸甜甜十分開胃醒神，肉多骨少啖啖肉非常滿足，薄薄脆漿不過份，索埋咕嚕汁好好食呢。

椒鹽雞軟骨，點解唔比淨雞軟骨喎？又唔比轉其他墊底喎？我唔食花生或腰果架，雖然又脆又香口，但我最憎乾爭爭麻。炸粉雖厚但不過份，夠香脆可口，吸收喼汁後帶酸醒胃，可去油膩及減低熱氣感覺，都滿意啦。椒鹽腰果鴨舌，討厭的腰果，我唔食架。炸得香胞既鴨舌我覺得麻麻地，我偏受滑溜多汁形。

韮菜豬紅，因為我食唔到韮菜既獨特味道，所以一向我都只會 order 淨豬紅架，但今晚有朋友仔想食韮菜，無緊要。熱辣辣豬紅滑溜入味，外脆內嫩，夾起唔易散，不要介意只係普通滷底，但已經做得非常滿意喇。如果提供埋勁辣辣椒油就更好啦 ﹗豬紅一咬爆汁，夠嫩夠味，淋上辣椒油，甜品一樣，係我既辣味甜品。

咸菜豬肚湯，一失再失 ﹗好很差喎，超咸入唔到口 ﹗咸味來自咸酸菜，成碗湯只有咸酸菜味，無胡椒亦無豬肚味，水汪汪既湯汁，機乎見唔到有湯料，我問事頭婆有無胡椒豬肚雞架？佢話係豬肚粉腸黎架。我搵到有 3 條好珍貴既粉腸囉，豬肚都有五六舊既，到底係咪唔記得落胡椒呀？

椒鹽海蝦，炸得通透，一定要原隻連殼連肉一齊食，咁先食到真正海蝦既鮮味 ﹗外殼脆卜卜、蝦肉爽甜多汁味香濃，撞埋一齊，結合得天衣無縫 ﹗蒜蓉蒸開邊蝦，蒜味霸道我鍾意 ﹗蒸得有點過火，但蝦鮮味出眾，係老左少少啫，但不失爽口。

椒鹽鮮魷，鮮魷勁新鮮，嫩滑中又彈彈的，薄薄一層炸漿剛剛好包住整魷魚，炸得香脆乾爽又無過燶，沾上喼汁美味非常。椒鹽鮮魷保持高質數 ﹗薄薄炸漿浸上酸酸喼汁，連彈牙鮮魷齊齊啪，酸汁係口腔內爆開，活腦醒神 ﹗

豉椒炒蟶子仔，跟炒蜆同出一徹，無鮮味可言，淡而無味，質地膠感十足。蟶子過份地出水，蛋白質、海水味、鮮味全部流失，回鑊撈個豉汁就出貨，無鑊氣無味道，唔係生炒根本唔會好食，雖然出水可以去砂啫。

椒鹽白飯魚，因為唔太喜歡薯條，所以我真係當薯條咁食架，掉一堆落喼汁度游下水，讓炸漿有足夠時間索盡喼汁，食咬奇酸無比，外脆內嫩，魚肉鬆軟又味道突出，助酒一流好好味。

酥炸桶蠔，脆卜卜都好香口，蠔肚啖啖肉，蠔味強烈而四溢，蠔汁直頭滴出黎喇 ﹗但蠔裙邊有硬又有渣，一向我都掉左去唔食呢。肥美巨形蠔肉被脆漿牢牢包著，一咬爆漿，蠔汁飛射，外面鬆脆、裡面滑溜，炸漿不過厚不太硬，真係做得唔錯啊。紅酒焗桶蠔，居然今晚連砵酒都無囉。奇怪地有點似蠔豉味既？連質地都似蠔豉喎。蠔味清香帶紅酒微甜不澀，味道唔錯，可以一試。

清蒸筍殼，我都係知道筍殼係魚無耐架乍，真係孤陋寡聞，sorry sorry。海魚您好野 ﹗魚味特濃，結實中帶嫩滑，蒸既時間掌握得非常到加，肉汁澎湃，撈上魚汁豉油，好食到不得了 ﹗仲要比我搶到膠口滑溜魚肚食，啖啖肉又無骨，正到震 ﹗百幾蚊條游水海魚，必食之算 ﹗

果皮蒸泥鯭，點解果皮無果皮味道呢？完全食唔到果皮味道，到底咩黎架？依隻 size 我最喜歡，跟我掌心大小差不多，肉質最正最嫩，滑而帶肉汁，泛著淡淡魚味，都還可以啦。但朋友稱喜歡食更大條，會更好味喎。

薑蔥魚腩煲，熱騰騰炸得乾爽香脆，濃郁薑蔥味道，魚肉外層金黃香口，裡面魚肉味濃而且結實。難得全部食晒，汁都無剩呀 ﹗蔥薑魚腩骨少肉多魚味濃，外層炸得金黃乾爽極為香口，魚肉 juicy 帶濃厚薑蔥味道。

椒絲腐乳通菜炒牛肉，終於到左水通季節喇，等到頸都長。淺綠色大大碌水通，鮮甜爽口多汁清香樣樣齊，大啜大啜咁連牛肉塞入口，完完全全感受到爆汁既澎湃。微辣腐乳加椒絲就更開胃啦，越食越想食。深綠色獀猛猛旱通就差得遠喇，又乾又硬呢。椒絲腐乳通菜炒牛肉，中學時同學仔推介而一試上癮既名菜 ﹗惹味微辣腐乳中帶點肉香，爽脆水通捲上嫩牛同吃，好味到啪啪聲 ﹗那有淺嚐輕嚼既理由，梗係要大束大束地豪氣塞入口啦 ﹗熱辣辣有鑊氣，無械可擊，我唔客氣啦 ﹗

清爽香甜生菜兜住大量香辣豆香腐乳，一濃一啖非常配合好味道，期間仲散發著淡淡肉香添 ﹗牛肉軟棉，索入腐乳變成乳香牛肉，好味道 ﹗椒絲腐乳通菜炒牛肉，翠綠水通又爽又多汁，空心水通注滿腐乳牛肉味直送入口。大啖大啖地掃入口，要塞得滿滿的趙，難以形容汁液係口中爆開及充實既感覺 ﹗餓鬼又出籠喇，個個爆醉，要食野頂住先 ﹗

椒絲腐乳生菜，微辣帶咸香豆味既腐乳非常惹味，快炒有鑊氣。每條菜莖都充滿水份，爽甜又多汁，聽得到的索索聲 ﹗食得腐乳通菜多都有點悶，轉下生菜或油麥菜都非常美味架。

勝瓜炒肉片，近來口味有好大既變化，除左大豆芽、芽菜、韮菜、西芹、原粒蒜頭、苦瓜、等等，都開始食得到，依家就連勝瓜都開始愛上，以前我剩係會飲湯既乍。豬肉軟棉味濃，勝瓜炒得外脆內嫩，外皮脆中帶咬口、勝瓜肉非常嫩滑多汁，仲要索左豬肉既香味，十分好味。一定要肉瓜同吃先最美味 ﹗勝瓜外脆內嫩滑夾住香甜肉片，好好食呢。

蒜蓉炒芥菜膽，突然黎個另類一點既菜色，第 1 次 order 乍，都話近來口味發生劇變呢 ﹗芥菜膽甘甜非常，充滿水份，輕輕咬一口，菜汁飛射，又有鑊氣，好食好食。

雞油炒豆苗，難得鹿鳴居有供應，唔知功夫如何呢？不怎樣嚐到雞油香味啊，我諗用雞湯炒味道都會濃過佢、好食過佢。豆苗新鮮爽嫩，無渣不老，好食好食，係無雞油味啫 ﹗打冷舖主菜唔係雞，由何來大量又靚又香既雞油喎。十幾年前係大埔墟北京桌球城隔離華香雞，招牌白切雞遠近馳明架 ﹗好懷念佢地既雞油豆苗、雞油白菜仔、雞油菜芯呢 ﹗雞味香濃又勁有鑊氣，從此愛上雞油配時蔬喇 ﹗