Das Gute (已結業)

做完運動，獎勵下自己，去買件蛋糕，落到地下LG，見有Das Gute新開，佢嘅麵包我好鍾意（蕃薯包 ），西餅未試過，新開張環境光鮮，光猛乾淨，已經晚上10點，依然有好多款麵包，西餅只有幾款，其中一款「雜莓芝士蛋糕」$38，賣相漂亮,同店員要了一件，店員用個硬底紙袋袋住件餅比我，可以用八達通比錢方便，返到屋企，打開個袋，件餅完整無缺！ （都驚個紙袋唔夠保護）附送膠叉，呢個幾方便，外面望落鬆軟，好像雪花咁，但食落唔得，偏乾，一啲都唔似慕絲，似普通海綿蛋糕！ （唔知係放雪櫃嘅問題，抽乾了？）而亦食唔出簡介咁講有兩種芝士！係食唔出有芝士味 ，面頭紅桑子新鮮，白朱古力香甜，中間餡料簡介話有櫻花及雲呢嗱嘅莓醬，我只食到莓味嘅酸酸甜甜，另外嗰兩樣味道都唔特出！不過莓醬味道係好味嘅！蛋糕底有塊餅做托底，脆口牛油味重！好味！但整體係失望嘅！好普通嘅西餅，唔值得呢個價錢！店員爽手，我要買餅時，近我嘅店員剛有客，另一個店員即刻補位，亦好快手！ 呢度都係買麵包好啲！