麻辣娘子 (形薈) (已結業)

筲箕灣因為呢個商場，開咗好多新餐廳，今日去咗呢個餐廳試吓午餐，價錢算唔錯。叫咗個回鍋肉，回鍋肉入口麻辣香都有，上枱賣相吸引，旁邊嘅配菜，青蔥，唐芹，辣椒，特別係椰菜都超級入味，鑊氣好夠。跟住嘅麻婆，基本功做得好，豆腐柔軟，又嫩又滑，肉碎辣椒特別香口，花椒味非常特出，入口唔會係死辣，汗喺頭頂慢慢滲出，辣味溫和，但又未至於成個口都會麻痹，食唔到鮮味，所以唔錯。午餐Menu加十零蚊要左個拍青瓜，覺得唔錯，蒜味非常之辛辣。跟餐加$8至$12可以點佢哋嘅台式飲品，個烏龍茶同埋黑糖珍珠奶茶，以$12來講黑糖風味都算唔錯，有茶香及奶味。可惜此店lunch都要加一服務費。兩個人埋單$158都唔錯，下次有機會可以試吓佢嘅酸菜魚呀或者辣雞煲。