Gourmet Burger Union (已結業)

早兩日食左。先講環境，寬敞，不過大半都係企位，眼明手快先有得坐。同埋好熱，冷氣唔夠，音樂超嘈，家下食熱狗唔係去酒吧喎。全自助服務，比錢遞單拿食物都係自己黎，比較細心既係雪櫃入面除左可樂汽水，重有冰同埋杯，所有野都黎凍既，唔錯。食物嘛，呢度玩自選創作漢堡，揀完肉再揀芝士再揀汁再揀Topping，最後揀包，揀左1/4牛肉，重有紅洋蔥同埋羊奶芝士，搭多個薯條，埋位開餐。包，還好，夠鬆軟，牛肉，唔夠熱，同埋無乜肉汁喎，芝士就好少，少到好似無落咁。薯條，超唔掂，真係落樓下買包自己炸都好過佢。價錢，咁樣食法，都成百二銀先走得甩，雖然係中環區，但係以質素而言，實在貴左少少，加上環境太嘈，無理由返轉頭。