你妳 (已結業)

同同事一齊喺黃埔經過呢間外賣小店，俾佢門口隻隨意門吸引到，望一望餐牌發現原來係食台灣嘢，好耐冇食過台灣嘢於是同同事一齊就決定喺度買外賣返公司食。套餐有三款，我就要咗1號套餐「夜市鹽酥拼盤便當」，另外三位同事都係要咗2號套餐「台式蛋餅」，兩個要魯肉飯一個要乾拌麵，我同另一位同事好肚餓於是我哋之後再追加一個多士。拼盤便當聞落好香，材料亦都非常豐富，每一款都炸得好香口，雖然係好邪惡，但味道好濃郁真係好好食。台式蛋餅我哋嗌咗三款口味，芋泥肉鬆、芝士肉鬆同埋芝士粟米，咬落好香脆而且好足料，每款各有自己特色，個人覺得最好食嗰款應該係芝士肉鬆蛋餅。魯肉飯同乾拌麵我冇食到，雖然睇落去好似有啲乾，但係同事食完之後話我知原來底嗰度有好多汁，唔會變得好乾身。最出乎意料係個「肉鬆紫薯吐司」，多士唔會因為紫薯變到好淋，同埋第一次食紫薯肉鬆呢個組合，其實幾夾，係咁餐嘅意外收穫。嘢飲嗌左杯「白桃烏龍茶」，好正宗好清新嘅台式飲品，而且唔會好甜，幾啱我口味。總括而言係幾好食嘅，唯一可惜佢只可以外賣自取。