嚐囍煲仔小菜

營業中

休息中

本來打算去另一間飲茶，不過排長龍，於是立即轉陣行一個街口來呢一間，雖然呢一間點心款式少啲，不過勝在裝修靚啲好坐啲，另外點心質素都唔錯嘅。我哋叫咗以下嘅點心：一籠有三粒嘅鵪鶉蛋燒賣出面唔係好多地方食得到，鵪鶉蛋同埋豬肉都好新鮮，似乎係自家製點心。鮮蝦腐皮卷入面啲蝦膠新鮮彈牙，外面腐皮好脆，幾香口幾好食。流沙千層糕又唔會太滯喎，一籠四件，個鹹蛋黃流沙做得幾香，都係好好食。黃金炸鮮奶上枱熱辣辣，炸皮好薄好脆，入面嘅鮮奶又香又滑，印象中出面好少地方食得到炸鮮奶。香煎韭菜粿超多韭菜，啲韭菜好新鮮好香，雖然係煎嘅，但係比想像中唔算好油膩，同埋個韭菜粿經鑊煎一煎特別香口。估唔到呢一間舖頭嘅蜜味叉燒腸會用一啲咁高質素嘅叉燒，食得出入面係叉燒粒而唔係叉燒醬溝啲肉，掂。